Արամ Ա կաթողիկոս. «Հայոց Ցեղասպանութիւնը ծրագրողի ու գործադրողի հասցէն յստակ է, ինչպէս նաեւ` Ցեղասպանութեան պատճառները»
«ԱԼԻՔ» – Նիկոլ Փաշինեանի՝ Հայոց Ցեղասպանութեան փաստը հարցականի տակ տանող վերջին յայտարարութիւնը շարունակում է մնալ ուշադրութեան կենտրոնում: Այն ընդգծւած բացասական տպաւորութիւն է թողել հայկական իրականութեան վրայ: Այս առիթով, Մեծի Տանն Կիլիկիոյ կաթողիկոսութեան CILICIA TV-ն դիմել է Ն.Ս.Օ.Տ.Տ. Արամ Ա կաթողիկոսին, իմանալու համար Վեհափառ հայրապետի տեսակէտը ՀՀ գործող վարչապետի Ցեղասպանութեան փաստը ուրացող յայտարարութեան վերաբերեալ:
Նորին սրբութիւնը նշել է, որ ծանօթ է յայտարարութեանը՝ նշելով, որ իր պատգամների եւ հրապարակային ելոյթների ընթացքում մշտապէս անդրադարձել է Հայաստանի անցեալի եւ ներկայի իշխանութիւնների վարած քաղաքականութեանը՝ արձագանգելով բացասական ու վնասաբեր երեւոյթներին եւ դրանց հնարաւոր հետեւանքներին՝ յստակօրէն մեկնելով մեր ազգի եւ հայրենիքի ընդհանրական եւ գերագոյն շահերից:
Պատասխանելով CILICIA TV-ի հարցմանը, Վեհափառ հայրապետը յստակօրէն նշել է. «Բոլորին ծանօթ է, որ պատմագէտները, ցեղասպանագէտներն ու Օսմանեան կայսրութեան մասնագէտները յստակ փաստերով արդէն իսկ հաստատել են Հայոց Ցեղասպանութեան՝ Օսմանեան կայսրութեան կողմից ծրագրւած լինելու իրողութիւնը: Միջազգային օրէնքի ու մարդու իրաւունքների մասնագէտներն, իրենց հերթին, պարզել են Հայոց Ցեղասպանութեան իրաւական հետեւանքները: Եւ, աւելին, չմոռնանք Հայաստանի Անկախութեան հռչակագիրի եւ Հայոց Ցեղասպանութեան 100-ամեակի համազգային յայտարարութեան մէջ կատարւած յստակ արտայայտութիւնը՝ օսմանեան Թուրքիայի կողմից գործադրւած Հայոց Ցեղասպանութեան մասին»:
Անդրադառնալով Հայոց Ցեղասպանութեան վերաբերեալ ՀՀ գործող վարչապետի արտայայտած տեսակէտներին, Արամ Ա կաթողիկոսն ասել է. «Նման մօտեցումները, ինչպէս ժողովուրդն է ասում, օտարի ջաղացքին ջուր լցնել է: Հայոց Ցեղասպանութեան քննութեան հարցը պատմաբաններին յանձնելու առաջարկը Թուրքիայի գաղափարն է: Մօտեցում, որը մեզ համար անընդունելի է եղել եւ է՛»: Վեհափառ հայրապետն աւելցրել է. «Հայոց Ցեղասպանութեան Օսմանեան կայսրութեան կողմից ծրագրւած լինելու պատմական իրողութիւնը վիճելի եւ, հետեւաբար, քննելի նիւթ չէ: Նոյնիսկ պետութիւնները, խորհրդարաններն ու միջազգային կազմակերպութիւնները հաստատել են դրա հեղինակի ով լինելը: Արդ, այս հանգրւանն անցել ենք եւ փաստօրէն հատուցման իրաւական հանգրւանում ենք գտնւում, որի առաջին քայլն է հանդիսացել 2015-ին Մեծի Տանն Կիլիկիոյ կաթողիկոսութեան բացած դատը` ուղղւած Թուրքիոյ պետութեան` պահանջելով Սիսի կաթողիկոսարանին վերադարձը»:
Արամ Ա կաթողիկոսը եզրափակելով իր խօսքը՝ յիշեցրել է. «Իրապաշտ քաղաքականութիւնից մղւած, համազգային արժէքների ու խորհրդանիշերի գծով հարցադրումներ կատարելով ու հակասութիւններ ստեղծելով, փաստօրէն անիմաստ վէճերի առիթ ենք տալիս: Պէտք է զգո՜յշ լինել: Ապրում ենք վտանգներով լի ժամանակներում: Շրջանի աշխարհաքաղաքական պայմանները նպաստաւոր չեն մեզ համար: Հետեւաբար, Մեր ջերմ թելադրանքն է, որ հեռու մնանք հայ կեանքում նոր ճեղքեր առաջացնող մօտեցումներից ու մտածումներից: Ինչպէս յաճախ շեշտել ենք, աւելի քան երբեւէ հրամայական է Հայաստանի եւ Սփիւռքի ազգային ուժերի համախմբումը՝ համահայկական օրակարգի շուրջ»:
