Թրամփը անվաւէր է ճանաչել բոլոր կոլեկտիւ պայմանագրերը, որոնք կնքւել են իր երդմնակալութիւնից 30 օր առաջ
«ԱԼԻՔ» – ԱՄՆ նախագահ Դոնալդ Թրամփը յայտարարել է, որ անվաւէր է ճանաչել Ջօ Բայդէնի նախորդ վարչակազմի կողմից կնքւած կոլեկտիւ բոլոր պայմանագրերը՝ իր երդմնակալութիւնից յետոյ 30 օրւայ ընթացքում։ Հաղորդում են միջազգային ԶԼՄ-ները:
«Նախորդ վարչակազմն իր պաշտօնավարման վերջին օրերին միտումնաւոր կոլեկտիւ պայմանագրեր կնքեց դաշնային աշխատակիցների հետ՝ փորձելով վնասել իմ վարչակազմին՝ երկարաձգելով նրա վատնող եւ ձախողւած քաղաքականութիւնը նրա պաշտօնավարման ընթացքում»,- ասել է Դոնալդ Թրամփը:
Օրինակ, նա ասել է, որ 2025 թւականի յունւարի 17-ին, իր պաշտօնը ստանձնելուց երեք օր առաջ, ԱՄՆ կրթութեան նախարարութիւնը համաձայնել է համագործակցութեան համաձայնագրի, որն, ընդհանուր առմամբ, արգելում է գործակալութեանը վերադարձնել հեռավար աշխատողներին իրենց գրասենեակներ:
«Վերջին րոպէի նման «վատ փողերով» որոշումները, որոնք նախատեսւած են նոր նախագահին իր նախորդի քաղաքականութեան հետ կապելու համար, հակասում են ամերիկեան ժողովրդավարական ինքնակառավարման համակարգին: Կոլեկտիւ պայմանագրերը, որոնք արագօրէն բանակցւեցին եւ ներառեցին ծայրայեղական քաղաքականութիւն նոր վարչակազմի նախօրէին, միտումնաւոր նախագծւած էին շրջանցելու ժողովրդի կամքը եւ մեր ժողովրդավարութիւնը: Նման համաձայնագրերը սահմանափակում են նախագահի լիազօրութիւնները՝ ղեկավարելու գործադիր իշխանութիւնը՝ կապելով նրա ձեռքերը անարդիւնաւէտ մեթոդներով»,- իր որոշումը պարզաբանել է ԱՄՆ նախագահը։
Նա յիշեցրել է, որ Գերագոյն դատարանի պարզաբանման համաձայն՝ նախագահը «չի կարող իր իրաւայաջորդներին կապել նրանց լիազօրութիւնները սահմանափակող պարտաւորութիւններով»։
«Հետեւաբար, Գործադիրի քաղաքականութիւնն այն է, որ կոլեկտիւ պայմանագրերը, որոնք կնքւել են նոր նախագահի երդմնակալութիւնից 30 օրւայ ընթացքում եւ նախատեսւած են ուժի մէջ մնալ, չնայած նոր նախագահի եւ վարչակազմի երդմնակալութեանը, չպէտք է հաստատւեն»,- ասել է Թրամփը:
