Գարիկ Քեռեան. «Հայաստանի ներքաղաքական թիւ մէկ խնդիրը մօտեցող ընտրութիւններն են»

«ԱԼԻՔ» – «Հայաստանի ներքաղաքական թիւ մէկ խնդիրը մօտեցող ընտրութիւններն են»: Այս մասին ֆէյսբուքեան իր էջում գրում է քաղաքագէտ Գարիկ Քեռեանը՝ անդրադառնալով Հայաստանի ներքաղաքական իրավիճակին:

Նրա խօսքով՝ պարզ է, որ կառավարող քաղաքական ուժի  թիւ մէկ խնդիրն էլ կրկին վերարտադրւելն  ու իշխանութիւնը պահելն է:

«Իմ դիտարկումներով պէտք է, որ 2025 թ. ամռանը կամ աշնան սկզբներին լինէին արտահերթ ընտրութիւններ: Ինչո՞ւ, որովհետեւ Թրամփի յաղթանակն առաւել հաւանական է դարձնում ուկրաինական պատերազմի աւարտը, որն իր հերթին առաւել հաւանական է դարձնում ռուսական գործօնի ազդեցութեան ուժեղացումը:

Ուրեմն  իշխանութիւնը պահելու տրամաբանութեան համապատասխան պէտք է վերարտադրւել քանի դեռ օտարերկրեայ ազդեցութեան գործօնը չի ակտիւացել: Սա առաջին փաստարկը:

Երկրորդը՝ Ադրբեջանի հետ խաղաղութեան պայմանագրի կնքումն է: Պայմանագրի շուրջ քաղաքական գործընթացները  հակասական բնոյթ են կրում: Պայքար մոդերատորութեան համար Մոսկւայի եւ Բրիւսէլ/Վաշինգտոն տանդեմի միջեւ, էլեկտրոնային դիւանագիտութիւն Երեւան-Բաքու ուղեգծով, Թեհրանի եւ Անկարայի անդրկուլիսեան բաւականին կոշտ ճնշումներ եւ մեծ հաւանականութեամբ  սեփական շահերից բխող պահանջներ ու նախապայմաններ:

Վերջին թարմ լուրն այն է, որ 17 յօդւածից 15-ն արդէն համաձայնեցւել է: Հանրութեան եւ փորձագիտական շրջանակներն այդպէս էլ տեղեկացւած  չեն եւ կռահելով են միայն կարծիքներ յայտնում: Ակնյայտ է, որ իշխող ուժի համար աւելի նպաստաւոր է սկզբում ընտրութիւնները եւ յետոյ պայմանագիրը, որովհետեւ նրա բովանդակութիւնն ամենայն հաւանականութեամբ բացասաբար է անդրադառնալու կառավարողների վարկանիշի վրայ:

Սակայն վերջին հարցազրոյցի ժամանակ վարչապետն ուղղակի նշեց, որ արտահերթ ընտրութիւններ չեն լինելու: Ինչպէս կարելի է բացատրել այս յայտարարութիւնը, եթէ իրողութիւնները այլ բան են թելադրում: Իմ կարծիքով վարկանիշային անկում նկատւեց կապւած շրջանառութեան նոր հարկային օրէնքի, եկամուտների համաընդհանուր յայտարարագրման, տրանսպորտի թանկացման եւ մի քանի այլ իրադարձութիւններ հետ կապւած, ինչպէս օրինակ,  մսավաճառների միջադէպը, պաշտօնանկութիւնները եւ ներկուսակցական պառակտումները: Երեւանի քաղաքային աւագանու ընտրութիւնների արդիւնքները, երբ մի կերպ յաջողւեց պահել քաղաքապետի աթոռը արդէն յուշում է, որ առաւել խնամքով պէտք է վերաբերւել  վարկանիշին, որպէսզի անակնկալներ չլինեն: Այդ նպատակով է, որ տրանսպորտի վարձավճարը իջեցւեց, իսկ յայտարարագրումն էլ հետաձգւեց:

Մնում է յաղթահարել խաղաղութեան պայմանագրի ներքաղաքական բացասական ազդեցութեան հետեւանքները, եթէ իհարկէ այն կնքւի: Իմ կարծիքով ցեղասպանութեան, Արարատ-Արագած եւ նմանատիպ այլ քննարկումները կարող են կապւած լինել պայմանագրի որոշ յօդւածների բովանդակութեան հետ: Ամփոփելով նշեմ, որ վերոյիշեալ գործօնների հետ կապւած արտահերթ ընտրութիւնների հարցը նորից կարող է օրակարգային դառնալ»,- գրել է քաղաքագէտը: