Սաուդեան Արաբիան պատրաստ է միջնորդ դառնալ Թրամփի վարչակազմի եւ Իրանի միջեւ
«ԱԼԻՔ» – Սաուդեան Արաբիան պատրաստ է միջնորդ դառնալ Թրամփի վարչակազմի եւ Իրանի միջեւ՝ Թեհրանի միջուկային ծրագրի սահմանափակման վերաբերեալ նոր համաձայնութեան հասնելու համար: Յայտնում է CNN-ը։
Սաուդեան Արաբիան յոյս ունի օգտագործել նախագահ Դոնալդ Թրամփի հետ իր սերտ կապերը՝ Իրանին դէպի Սպիտակ տուն դիւանագիտական կամուրջ ապահովելու համար:
Յայտնի չէ, թէ արդեօք Սաուդեան Արաբիան պաշտօնական առաջարկ է արել, բայց այս քայլն ընդգծում է իր նախկին ախոյեանի հետ բարելաււած յարաբերութիւնները զարգացնելու եւ հնարաւոր նոր գործարքի բանակցութիւնների սեղանի շուրջ իր համար տեղ ապահովելու Ռիադի ցանկութիւնը:
Ըստ CNN-ի՝ Սաուդեան Արաբիան հրապարակայնօրէն ողջունել է 2015 թւականին Իրանի եւ համաշխարհային տէրութիւնների միջեւ կնքւած միջուկային համաձայնագիրը, սակայն մասնաւոր կարգով զայրացել է, որ ԱՄՆ-ի այն ժամանակւայ նախագահ Բարաք Օբամայի վարչակազմն անկարող է եղել «լուծել Թեհրանի տարածաշրջանային գործունէութեան հետ կապւած իր խնդիրները, մասնաւորապէս՝ նրա հրթիռային ծրագրի եւ Եմէնից մինչեւ Իրաք ու Լիբանան միջնորդ խմբաւորումների հարցերը», որոնք Ռիադը դիտում էր որպէս սպառնալիք տարածաշրջանի կայունութեան համար:
Աւելի ուշ Սաուդեան Արաբիան ողջունեց 2018 թւականին Թրամփի դուրս գալը գործարքից։ Թրամփի պաշտօնը լքելուց մէկ տարի անց Սաուդեան Արաբիայի նաւթային օբիեկտները ենթարկւեցին անօդաչուների եւ հրթիռների զանգւածային յարձակման, որը ժամանակաւորապէս կրկնակի նւազեցրեց աշխարհում նաւթի ամենամեծ արտահանողի հում նաւթի արդիւնահանումը: Միջադէպի պատասխանատւութիւնը ստանձնեցին Եմէնի հութիները, սակայն ԱՄՆ-ն մեղադրեց Իրանին:
Սակայն այն ժամանակներից Սաուդեան Արաբիայի եւ Իրանի միջեւ լարւածութիւնը զգալիօրէն թուլացել է: 2023 թւականի մարտին երկու երկրներն անսպասելիօրէն յայտարարեցին յարաբերութիւնների կարգաւորման մասին՝ Չինաստանի միջնորդութեամբ կնքւած գործարքի շրջանակներում։
Սաուդեան պաշտօնեաները գործարքը համարում են մեծ յաջողութիւն՝ կարծիք յայտնելով, որ Ռիադը քաղել է իր օգուտները. հութիների յարձակումները Սաուդեան Արաբիայի տարածքի վրայ դադարեցւել են, եւ թագաւորութիւնը խուսափել է Իսրայէլի եւ Իրանի միջեւ անցեալ տարւայ բախումներից՝ չնայած այն մտավախութեանը, որ Թեհրանը կարող է հարւածել Պարսից ծոցի արաբական երկրների նաւթային օբիեկտներին, եթէ իր սեփական օբիեկտները վնասւեն:
