Արման Թաթոյեան. «Աւետիք Իշխանեանը Հայաստանի բոլոր ժամանակների լաւագոյն իրաւապաշտպաններից է, ով մինչեւ վերջ հաւատարիմ մնաց իր առաքելութեանը»
«ԱԼԻՔ» – ՀՀ Մարդու իրաւունքների նախկին պաշտպան Արման Թաթոյեանը ֆէյսբուքեան իր էջում գրառում է կատարել՝ անդրադառնալով նախօրէին կեանքին հրաժեշտ տւած անւանի իրաւապաշտպան Աւետիք Իշխանեանի կերպարին:
«Աւետիք Իշխանեանը Հայաստանի բոլոր ժամանակների լաւագոյն իրաւապաշտպաններից է, նա հայ ժողովրդի զարթօնքի, ոգու վերելքի, ինքնութիւնը գնահատող բացառիկ մարդ էր, որ մինչեւ վերջ հաւատարիմ մնաց իր առաքելութեանը:
Աւետիք Իշխանեանի հետ ծանօթացել եմ 2004 թ., երբ սկսեցի աշխատել Մարդու իրաւունքների պաշտպանի նորաստեղծ աշխատակազմում: Այդ օրերից ի վեր Աւետիքը եղել է իմ աւագ ընկերն ու եղբայրը, եղել է մարդ, ումից ես միշտ սովորել եմ:
Նրա հետ միասին ստեղծել ենք Խոշտանգումների կանխարգելման մեխանիզմը, մշակել ենք ազատազրկւածների աստիճանական ազատ արձակման փաթեթը, վարել եմ պարոն Իշխանեանի կազմակերպած բազմաթիւ թրէյնինգներ, միասին եղել ենք տարբեր երկրներում աշխատանքային այցերի: 2016 թ. Ոստիկանութեան ՊՊԾ գնդի գրաւման իրադարձութիւնների, 2016 թ. քառօրեայ, 2020 թ. 44-օրեայ, Տաւուշում 2020 թ. յուլիսեան յարձակումների, COVID-ի ու միւս ժամանակահատւածներում Աւետիքի խորհուրդներն ինձ համար բացառիկ օգտակար էին, միշտ իմաստուն խօսքով օգնում էր:
Հումորի անկրկնելի զգացում ունէր, կենսախինդ մարդ էր եւ անչափ սիրում էր իր ընտանիքը:
Աւետիք ջան, մնաս լոյսերի մէջ, յիշատակդ թող միշտ վառ լինի»,- գրել է ՀՀ նախկին ՄԻՊ-ը:
