Մարկօ Ռոբիօ. «Ուկրաինայում հակամարտութեան դադարեցումը բոլոր կողմերից զիջումներ կը պահանջի»
«ԱԼԻՔ» – «Ուկրաինայում հակամարտութիւնը դադարեցնելու ուղղութեամբ աշխատանքը երկար ժամանակ կը պահանջի եւ բարդ ու ինտենսիւ դիւանագիտութիւն»: Այս մասին, ըստ միջազգային ԶԼՄ-ների՝ Ռիադում ռուսական պատւիրակութեան հետ բանակցութիւններից յետոյ ասել է ԱՄՆ պետքարտուղար Մարկօ Ռուբիոն։
Նրա խօսքով՝ Ուկրաինայում հակամարտութեան դադարեցումը բոլոր կողմերից զիջումներ կը պահանջի: ԱՄՆ պետքարտուղարի համոզմամբ՝ հակամարտութեան դադարեցումը հնարաւոր է միայն բոլոր կողմերի համաձայնութեամբ, պայմանները պէտք է լինեն փոխընդունելի:
Ըստ Ռուբիոյի՝ ԱՄՆ նախագահ Դոնալդ Թրամփը ցանկանում է արդար լուծում տալ հակամարտութեանը եւ թոյլ չտալ դրա վերսկսումը 2-3 տարի անց:
Նա նաեւ ասել է, որ Ուկրաինայի հարցով բանակցութիւնների ապագան կորոշւի կողմերի՝ «խոստումները կատարելու» պատրաստակամութեամբ, դա կերեւայ արդէն առաջիկայ շաբաթներին։
«Վաշինգտոնում եւ Մոսկւայում մեր համապատասխան առաքելութիւնների ֆունկցիոնալութիւնը վերականգնելու համար պէտք է կանոնաւոր աշխատող դիւանագիտական հաստատութիւններ ունենանք:
Մենք մտադիր ենք մեր կողմից բարձր դիրք զբաղեցնող թիմ նշանակել, որը կօգնի բանակցել եւ աշխատել Ուկրաինայում հակամարտութիւնը դադարեցնելու ուղղութեամբ, ինչը տեւական եւ ընդունելի կը լինի բոլոր ներգրաււած կողմերի համար:
Հարկաւոր է սկսել քննարկել, մտորել եւ ուսումնասիրել ինչպէս աշխարհաքաղաքական, այնպէս էլ տնտեսական համագործակցութիւնը, որը կարող է առաջանալ ուկրաինական հակամարտութեան դադարեցման արդիւնքում։
Նրանք, ովքեր այսօր մասնակցել են բանակցութիւններին, կը շարունակեն մասնակցել այդ գործընթացին՝ համոզւելու համար, որ այն արդիւնաւէտ առաջ է ընթանում»,- յայտարարել է Ռուբիօն։
