Ատոմային էներգիայի միջազգային գործակալութեան գլխաւոր տնօրէնը Թեհրանում հանդիպել է ԱԳ նախարարի հետ
«ԱԼԻՔ» – Ատոմային էներգիայի միջազգային գործակալութեան գլխաւոր տնօրէնը Թեհրան ժամանելուն պէս առաջին աշխատանքային նիստի ընթացքում հանդիպել է ԱԳ նախարարին: Այս մասին է տեղեկացրել ԱԳՆ մամլոյ ծառայութիւնը:
Արաղչին Թեհրանում Գրոսսիի հետ հանդիպմանն ընդգծել է. «ՄԱԳԱՏԷ-ից ակնկալւում էր լուրջ դիրքորոշում՝ Իրանի միջուկային կառոյցների դէմ հնչած սպառնալիքների նկատմամբ»:
Ռաֆայէլ Գրոսսին, ով 14-րդ կառավարութեան շրջանում երկրորդ անգամ է այցելում Իրան, ԱԳՆ-ում հանդիպել է արտգործնախարար Սէյէդ Աբբաս Արաղչիի հետ եւ մտքեր փոխանակել Իրանի հետ գործակալութեան տեխնիկական համագործակցութեան եւ փոխգործակցութեան վերջին կարգավիճակի եւ առաջընթացի շուրջ։
Յիշեցնելով միջազգային իրաւական պարտաւորութիւնների շրջանակներում գործակալութեան հետ փոխգործակցութիւնն ու համագործակցութիւնը շարունակելու Իրանի վճռականութեան մասին, Արաղչին ընդգծել է, որ գործակալութիւնը պէտք է իր մասնագիտական եւ տեխնիկական դերն ստանձնի իր պարտականութիւնների ու առաքելութիւնների շրջանակներում՝ առանց կողմերի անհիմն ճնշումների ազդեցութեանը ենթարկւելու
Այս հանդիպման ընթացքում արտգործնախարարը ՄԱԳԱՏԷ-ի գլխաւոր տնօրէնին է ներկայացրել Օմանի միջնորդութեամբ Իրանի եւ ԱՄՆ-ի բանակցութիւնները՝ Իրանի միջուկային ծրագրի շուրջ եւ ընդգծել՝ Ատոմային էներգիայի միջազգային գործակալութեան կողմից Իրանի խաղաղ միջուկային օբիեկտներին ուղղւած սպառնալիքների վերաբերեալ յստակ եւ թափանցիկ դիրքորոշում որդեգրելու անհրաժեշտութիւնը։
Հանդիպմանը ՄԱԳԱՏԷ-ի գլխաւոր տնօրէնն իր գոհունակութիւնն է յայտնել Թեհրան մեկնելու հնարաւորութեան համար, եւ ընդգծել Իրանի եւ Գործակալութեան միջեւ փոխգործակցութեան եւ համագործակցութեան շարունակականութիւնը, ինչպէս նաեւ այլ կողմերի հետ խորհրդակցութիւններն առկայ խնդիրների լուծման նպատակով համապատասխան մթնոլորտ ստեղծելու համար:
Գրոսսին ողջունել է Իրանի եւ ԱՄՆ-ի միջեւ անուղղակի բանակցութիւնները, եւ յայտարարել՝ Գործակալութեան լիակատար աջակցութեան մասին:
Նա յոյս է յայտնել, որ բանակցութիւնները շարունակւեն այնքան ժամանակ, քանի կողմերը բարենպաստ արդիւնքի չեն հասել:
