Վատիկանի համալսարանը մեղադրւում է Ադրբեջանի կողմից հայ քրիստոնեաներին ոչնչացնելու ջանքերն օրինականացնելու մէջ
«ԱԼԻՔ» – Կրօնական առաջնորդներն ու մարդու իրաւունքների պաշտպանութեամբ զբաղւող խմբերը դատապարտել են Վատիկանի համալսարանի որոշումը՝ Ադրբեջանում պետականօրէն հովանաւորւող համաժողով անցկացնելու վերաբերեալ՝ նշելով, որ միջոցառումը հարթակ է տւել ադրբեջանական պատմական ռեւիզիոնիստներին, որոնք փորձում են ջնջել հայկական պատմութիւնը «երկու երկրների միջեւ վիճելի տարածքներից»: Հաղորդում է The Christian Post-ը։
Հայ Առաքելական Եկեղեցու Ամերիկայի Արեւելեան թեմի արքեպիսկոպոս Վիգէն Հայկազեանը կարծում է, որ «Քրիստոնէութիւնն Ադրբեջանում. պատմութիւն եւ արդիականութիւն» միջոցառումը նւիրւած է փողին։
Ապրիլի 10-ին Սուրբ Աթոռի Պապական Գրիգորեան համալսարանում տեղի ունեցած համաժողովին ելոյթներ են ունեցել բանախօսներ Թուրքիայից, Ղազախստանից, Ուզբեկստանից, Վրաստանից, Ռուսաստանից, Հարաւային Կորէայից, Լեհաստանից, Իտալիայից, Գերմանիայից, Ֆրանսիայից, ԱՄՆ-ից եւ Լիտւայից:
Անցեալ շաբաթ The Pillar-ին տւած յայտարարութեան մէջ Հայկազեանը նշել էր, որ Ադրբեջանի կողմից Վատիկանի նախագծերի ֆինանսաւորումն ազդել է դրա մօտեցման վրայ երկրի եւ Հայաստանի միջեւ շարունակւող հակամարտութեան նկատմամբ։ Արքեպիսկոպոսը նշել է, որ Վատիկանի որոշ կարդինալներ եւ պաշտօնեաներ ֆինանսաւորում են ստացել Ադրբեջանից։
Ի պատասխան The Christian Post-ի հարցման՝ Հռոմի պապական «Գրիգորեան» համալսարանի ներկայացուցիչը շեշտեց, որ հաստատութիւնը չի մասնակցել միջոցառման կազմակերպմանը եւ «չի ապահովել հովանաւորութիւն կամ համագործակցութիւն»։
Ըստ նրա՝ «Այս վայրում դրա տեղակայումը որոշւում էր բացառապէս դահլիճի վարձակալութեամբ»։
Բաքւում գործող Բազմամշակութայնութեան միջազգային կենտրոնն անմիջապէս չի արձագանգել The Christian Post-ի մեկնաբանութեան խնդրանքին։
Ըստ The Pillar-ի, միջոցառման գովազդային նիւթերը ներառում էին «Արեւմտեան Ասիայի պատմութեան յստակ ադրբեջանական ընթերցումներ», ինչպիսին է Դադիվանքի միջնադարեան հայկական վանքի մասին ցուցահանդէսը։ Ցուցահանդէսում ներառւած էր Ադրբեջանի կառավարութեան յայտարարութիւնն այն մասին, որ հայկական վանքը պատկանում է «կովկասեան ալբանացիների» մշակոյթին։
Այս ամսւայ սկզբին Artsakh Monument Watch անկախ ակադեմիական հարթակը լրացուցիչ մտահոգութիւններ յայտնեց համաժողովի վերաբերեալ՝ ասելով, որ կազմակերպիչները միջոցառումը գաղտնի են կազմակերպել։
«Ադրբեջանական կողմը խիստ գաղտնի է պահել համաժողովի մասին տեղեկատւութիւնը եւ հրապարակել այն դրա մեկնարկից 1-2 օր առաջ։ Համաժողովի մուտքը նոյնպէս փակ է եղել»,- ասւում է «Artsakh Monument Watch»-ի կայքում տեղադրւած յայտարարութեան մէջ։
Մոնիթորինգի խմբի տւեալներով՝ համաժողովի մի քանի մասնակիցներ ադրբեջանական քարոզչութիւն տարածելու պատմութիւն ունեն։ Համաժողովի մասնակիցներից մէկը ռուս հոգեւորական արքեպիսկոպոս Ալեքսին է (Անդրէյ Վ. Նիկոնորով):
Ինչպէս արդէն նշւեց, հոգեւորականը յայտնի էր հակաթուրքական յայտարարութիւններով՝ ներկայանալով որպէս գիտնական։
«Ռուս հոգեւորականը, որը պատմութեան «մասնագէտ» է եւ պաշտպանում է նաեւ ուղղափառութեան շահերը, կարծես թէ, նորմալ է համարում Շուշիի հայկական եկեղեցիներն ուղղափառ յայտարարելը, մինչդեռ լռում է խորհրդային տարիներին աւերւած ռուսական եկեղեցիների մասին: Իր որոշ յայտարարութիւններում նա նաեւ կասկածելի մտքեր է արտայայտում Հայ Առաքելական Եկեղեցու մասին»,- նշել է մոնիթորինգային խումբը:
