Նախագահը Հնդկաստանի եւ Պակիստանի վարչապետներին յայտնել է, որ պատրաստ է օգնել երկու երկրների միջեւ լարւածութեան թուլացմանը
«ԱԼԻՔ» – Հանրապետութեան նախագահ Մասուդ Փեզեշքիանը երէկ՝ ապրիլի 26-ին, բանակցութիւններ է վարել Հնդկաստանի եւ Պակիստանի վարչապետներ Նարենդրա Մոդիի եւ Շեհբազ Շարիֆի հետ՝ երկու հարեւան երկրների միջեւ լարւածութեան աճի ֆոնին:
Հնդկաստանի վարչապետի հետ հեռախօսազրոյցում նախագահը խստօրէն դատապարտել է Հնդկաստանի Փահալգամ քաղաքում տեղի ունեցած ահաբեկչական յարձակումը եւ ցաւակցութիւն յայտնել այդ երկրի կառավարութեանն ու ժողովրդին։
Փեզեշքիանը նաեւ ընդգծել է տարածաշրջանի երկրների միջեւ համագործակցութեան անհրաժեշտութիւնը՝ ահաբեկչութեան դէմ պայքարի եւ ահաբեկչութեան նման տարածւած երեւոյթի դէմ պայքարում միասնութեան ամրապնդման համար։
Պակիստանի վարչապետի հետ հեռախօսազրոյցում նա նոյնպէս շեշտել է ահաբեկչութեան չար երեւոյթի դէմ պայքարում համագործակցութեան անհրաժեշտութիւնը։
Փեզեշքիանը Շարիֆին ասել է, որ պաշտօնական Թեհրանը պատրաստ է օգնել լիցքաթափել Պակիստանի եւ Հնդկաստանի միջեւ առկայ թիւրըմբռնումները եւ լուծել դրանք։
«Վերջին ահաբեկչական միջադէպերը կրկնապատկել են տարածաշրջանային համագործակցութեան ընդլայնման անհրաժեշտութիւնը՝ ահաբեկչութեան չարիքին հակազդելու եւ ահաբեկչական խմբաւորումների ֆինանսական ու զէնքի ենթակառուցւածքները ոչնչացնելու համար։ Մենք պէտք է մեր բոլոր ջանքերը կենտրոնացնենք տարածաշրջանում խաղաղութիւն, անվտանգութիւն եւ անդորր հաստատելու վրայ»,- ասել է Հանրապետութեան նախագահն իր զրուցակիցներին։
