Նասիրզադէն՝ Փաշինեանի հետ հանդիպմանը. «Իրանը շահագրգիռ է զարգացնելու բազմակողմ համագործակցութիւնը Հայաստանի հետ»
«ԱԼԻՔ» – Պաշտօնական այցով Հայաստան այցելած Պաշտպանութեան նախարար, գեներալ Ազիզ Նասիրզադէն եւ նրա գլխաւորած պատւիրակութիւնը երէկ՝ մայիսի 21-ին հանդիպել են ՀՀ վարչապետ Նիկոլ Փաշինեանի հետ: Այս մասին հաղորդում է «Արմենպրես»-ը:
Հանդիպման ընթացքում Ազիզ Նասիրզադէն ՀՀ վարչապետին է փոխանցել Հանրապետութեան նախագահ Մասուդ Փեզեշքիանի ջերմ ողջոյնները եւ նշել, որ Ւրանը շահագրգիռ է զարգացնելու բազմակողմ համագործակցութիւնը Հայաստանի հետ: Նա եւս մէկ անգամ ընդգծել է Իրանի Իսլամական Հանրապետութեան անվերապահ աջակցութիւնը Հայաստանի ինքնիշխանութեանն ու տարածքային ամբողջականութեանը:
Նիկոլ Փաշինեանն իր հերթին գոհունակութեամբ ընդգծել է, որ Իրան-Հայաստան յարաբերութիւնները զարգանում են բարձր տեմպերով, ինչը հիմնւած է երկկողմ բնական շահերի վրայ: Նա համագործակցութեան ընդլայնման ու խորացման գործում շեշտել է երկու երկրների իշխանութիւնների քաղաքական կամքը: ՀՀ վարչապետը կարեւորել է առկայ հնարաւորութիւնների լիարժէք իրացումն ու այդ ուղղութեամբ հետեւողական քայլերի իրականացումը:
Զրուցակիցները քննարկել են Իրան-Հայաստան համագործակցութեան օրակարգին եւ տարածաշրջանային անվտանգութեան ու կայունութեան ապահովմանը վերաբերող հարցեր:
Յաւելենք նաեւ, որ գեներալ Նասիրզադէն երէկ հանդիպել է նաեւ ՀՀ անվտանգութեան խորհրդի քարտուղար Արմէն Գրիգորեանի հետ:
Հանդիպման ընթացքում նախարար Նասիրզադէն վերահաստատել է Իրանի աջակցութիւնը Հայաստանի Հանրապետութեան տարածքային ամբողջականութեանն ու տարածաշրջանի երկրների անկախութեանը՝ դէմ արտայայտւելով միջազգային ճանաչւած սահմանների ցանկացած փոփոխութեան:
Արմէն Գրիգորեանն էլ ողջունել է նախարարի այցը Հայաստան եւ կարեւորել ակտիւացած երկկողմ փոխայցելութիւնները, որոնք իրենց նպաստն են բերում Իրան-Հայաստան բարեկամական յարաբերութիւնների շարունակական զարգացմանը եւ ամրապնդմանը:
Յիշեցենք, որ ՊՆ Ազիզ Նասիրզադէն եւ նրա գլխաւորած պատւիրակութիւնը Երեւան էին այցելել ՀՀ ՊՆ Սուրէն Պապիկեանի պաշտօնական հրաւէրով:
