Արաղչին CBS-ի հետ զրոյցում. «Չկայ վստահութիւն, որ ԱՄՆ-ն մեզ կրկին չի թիրախաւորի բանակցութիւնների ընթացքում»
«ԱԼԻՔ» – ԱԳ նախարարը, նշելով, որ բանակցութիւնները վերսկսելու համար նախ պէտք է Իրանը վստահանայ, որ ԱՄՆ-ն ռազմական ագրեսիայի չի գնայ բանակցութիւնների ընթացքում, ընդգծել է, որ Իրանը չի փակել դիւանագիտութեան դռները:
Ամերիկեան CBS-ին տւած հարցազրոյցում Սէյէդ Աբբաս Արաղչին անդրադարձել է ԱՄՆ նախագահ Դոնալդ Թրամփի անցեալ շաբաթ արած յայտարարութիւններին, այդ թւում՝ «բանակցութիւնները վերսկսելու ենք այս շաբաթ» յայտարարութեանը, ԱԳ նախարարն ի պատասխան նշել է, որ չի կարծում, որ բանակցութիւններն այդքան արագ կը վերսկսւեն։
CBS-ի լրագրողի այն հարցին, թէ ինչն է պակասում որոշման վերանայման համար, Արաղչին ընդգծել է. «Վերանայման որոշում կայացնելու համար մենք նախ պէտք է համոզւենք, որ ԱՄՆ-ն կրկին ռազմական յարձակմամբ չի թիրախաւորի բանակցութիւնների ընթացքը: Այնպէս, որ այս եւ այլ նկատառումներով մեզ դեռ աւելի շատ ժամանակ է պէտք նման որոշում կայացնելու համար»։
Նա յաւելել է. «Այնուամենայնիւ, դիւանագիտութեան դռները երբէք փակ չեն եղել»։
Արաղչին նաեւ արձագանքել է Թրամփի այն պնդմանը, որ Իրանի միջուկային օբիեկտները ոչնչացւել են՝ յիշեցնելով, որ հարստացման տեխնոլոգիան ու տեղայնացւած գիտութիւնը ռմբակոծելով չէ, որ ոչնչացւելու է։
ԱԳ նախարարը նշել է նաեւ, որ երբ Իրանը կամենայ այս արդիւնաբերութիւնը կրկին առաջ կը մղի: «Մենք կարող ենք արագ վերականգնել վնասներն ու բաց թողնւած ժամանակը»,- նշել է նա։
Արաղչին ընդգծել է. «Իրանի խաղաղ միջուկային ծրագիրը ազգային հպարտութեան առիթ է ու պատւաբեր կարողութիւն՝ Իրանի ժողովրդի համար»։
ԱԳ նախարարը յիշեցնելով այն փաստը, որ Իրանը դիմադրել եւ պատւով է դուրս եկել պարտադրւած 12-օրեայ պատերազմից, ընդգծել է. « Մեր ժողովուրդը հեշտութեամբ չի հրաժարւի իր իարաւունքներից, յատկապէս հարստացման խաղաղ ծրագրից»։
Նախարարը ցանկացած ռազմական ագրեսիայի դէպքում՝ Իրանի պաշտպանւելու կարողութեան մասին ակնարկելով, ընդգծել է. «Մենք ցոյց տւեցինք, թէ ինչպէս է կարելի պաշտպանւել քեզ անակնկալի բերած յարձակման եւ պատերազմի ընթացքում: Եթէ կրկին ենթարկւենք նման ագրեսիաների, Իրանի ժողովուրդը նոյն կերպ արձագանքելով՝ ծնկի կը բերի թշնամիներին»:
