Պուտինը 2022 թւականից ի վեր առաջին հեռախօսազրոյցն է ունեցել Մակրոնի հետ
Կողմերը քննարկել են հակամարտութիւնը Ուկրաինայում, Մերձաւոր Արեւելքում խաղաղութեան պահպանման եւ միջուկային զէնքի չտարածման հարցերը
«ԱԼԻՔ» – Ռուսաստանի Դաշնութեան նախագահ Վլադիմիր Պուտինը 2022 թւականից ի վեր առաջին անգամ հեռախօսազրոյց է ունեցել իր ֆրանսիացի գործընկեր Էմմանուէլ Մակրոնի հետ։ Այս մասին ըստ ռուսաստանեան ԶԼՄ-ների՝ տեղեկացնում է Կրեմլի մամուլի ծառայութիւնը:
Հեռախօսազրոյցի ընթացքում կողմերը հարցերի լայն շրջանակ են քննարկել:
Մասնաւորապէս, ըստ Կրեմլի հաղորդագրութեան՝ «Պուտինը յիշեցրել է, որ Ուկրաինայում հակամարտութիւնը Արեւմտեան քաղաքականութեան ուղղակի հետեւանք է։ Խօսելով խաղաղ կարգաւորման հեռանկարների մասին՝ նա հաստատել է հնարաւոր համաձայնագրերի հիմնարար մօտեցումները։
Համաձայնագրերը պէտք է լինեն երկարաժամկէտ, նախատեսեն արմատական պատճառների վերացումը եւ հիմնւած լինեն իրականութեան վրայ։
Պուտինն ու Մակրոնը նշել են Ռուսաստանի եւ Ֆրանսիայի պատասխանատւութիւնը Մերձաւոր Արեւելքում խաղաղութեան պահպանման եւ միջուկային զէնքի չտարածման ռեժիմի պահպանման գործում։ Կողմերը հանդէս են եկել իրանական միջուկային ծրագրի շուրջ ճգնաժամի կարգաւորմանը քաղաքական եւ դիւանագիտական միջոցներով հասնելու օգտին։
Պուտինն ու Մակրոնը ընդգծել են Թեհրանի խաղաղ միջուկային էներգիայի օրինական իրաւունքը յարգելու, Միջուկային զէնքի չտարածման մասին համաձայնագրի շրջանակներում իր պարտաւորութիւնները կատարելու եւ Ատոմային էներգիայի միջազգային գործակալութեան հետ համագործակցելու կարեւորութիւնը։
Կողմերը համաձայնել են շարունակել շփումները՝ Մերձաւոր Արեւելքում ստեղծւած իրավիճակի վերաբերեալ դիրքորոշումների հնարաւոր համաձայնեցման նպատակով»։
