Զախարովան՝ ՀՀ կառավարութեան եւ Հայ Առաքելական Եկեղեցու միջեւ հակամարտութեան մասին. «Եկեղեցին հիմնարար, համախմբող բազա էր, եւ յանկարծ սկսեցին սերմանել այս խաւարամտութիւնը»
Հայաստանի կառավարութեան եւ Եկեղեցու միջեւ հակամարտութիւնը արհեստականօրէն է հրահրւում
«ԱԼԻՔ» – ՌԴ ԱԳՆ պաշտօնական ներկայացուցիչ Մարիա Զախարովան Հայաստանի իշխանութիւնների եւ Հայ Առաքելական Եկեղեցու միջեւ առկայ հակամարտութիւնն անւանել է արհեստականօրէն հրահրւող։ Հաղորդում է Alpha News-ը:
Դիւանագէտի խօսքով՝ Մոսկւան գնահատականներ չի տայ, սակայն չի կարող չտեսնել, թէ ինչպէս են Հայաստանում, որտեղ հաւատքը դարեր շարունակ որոշել է մշակութային եւ ազգային ինքնութիւնը, կրկին հանրութեան ուշադրութեան կենտրոնում յայտնւել պետութեան եւ Հայ Առաքելական Եկեղեցու յարաբերութիւնները։
Նա պարզաբանել է, որ սա «պետութեան կողմից Եկեղեցուն օգնութեան կամ Եկեղեցու եւ հասարակութեան, քաղաքացու եւ պետութեան փոխգործակցութեան հարց չէ»։ Փոխարէնը, նա դրանք բնութագրել է որպէս «զուտ ներքին գործընթացներ, որոնք, աւաղ, ոչ թէ ընդգծում են պառակտումը, այլ հրահրւած են արհեստականօրէն»։
«Այսինքն՝ մարդիկ տարաձայնութիւններ ունէին տնտեսութեան, քաղաքականութեան, քաղաքացիական իրաւունքների ու ազատութիւնների, օրէնսդրութեան շուրջ, ցանկացած այլ հարթութիւնում՝ բացի սրանից։ Սա հիմնարար, համախմբող բազա էր, եւ յանկարծ սկսեցին սերմանել այս խաւարամտութիւնը եւ մարդկանց իրար դէմ հանել»,- նշել է դիւանագէտը։
