Սուրէն Սուրէնեանց. «Էջմիածինը կարող է դառնալ Փաշինեանի քաղաքական ֆիասկոյի խորհրդանիշ»
«ԱԼԻՔ» – Էջմիածինը կարող է դառնալ Փաշինեանի քաղաքական ֆիասկոյի խորհրդանիշ։ Այս մասին ֆէյսբուքեան իր էջում գրել է քաղաքագէտ Սուրէն Սուրէնեանցը։
«Շաբաթներ շարունակ իշխանական քարոզչութիւնն ազդարարում է Վաղարշապատում «մեծ հոգեւոր հաւաք» եւ հնարաւոր «երթ դէպի Վեհարան»։
Հանրային դիսկուրսում տարածւեց համոզումը, թէ Վարդավառի մարդաշատ օրը կառավարութիւնը կը նախընտրի ուժով պարպել լարւածութիւնը եւ թուլացնել Եկեղեցու հեղինակութիւնը։
Ես ի սկզբանէ այս վարկածը համարել եմ վիճահարոյց:
Վեհարանը, յատկապէս Վարդավառի խորհրդանշական օրը, վայելում է լայն համակրանք․ ցանկացած ուժային միջամտութիւն կարող էր իշխանութիւնը կանգնեցնել զանգւածային անհնազանդութեան առաջ։
Փաշինեանը, գիտակցելով հաւանական ռիսկերը, ընտրել է «սառեցման» մարտավարութիւն՝ ժամանակ շահելու համար:
Մի կողմից, Փաշինեանը՝ Եկեղեցու հետ կապւած իր սկանդալային, հակասահմանադրական յայտարարութիւնների բերումով, իրեն դրել է փակուղու մէջ, միւս կողմից՝ նա «մեծ հոգեւոր հաւաքի» կոնկրետ ժամկէտներ չի նշել՝ իր համար թողնելով մանեւրելու հնարաւորութիւն:
Ես գրեթէ վստահ եմ, որ այս ուղղութեամբ Փաշինեանի մօտ ակտիւութիւն կը նկատւի հոկտեմբեր-նոյեմբեր ամիսներին, երբ Վաղարշապատում սպասւում են ՏԻՄ ընտրութիւններ:
Ընտրութիւնների ժամանակ, որպէս կանոն, ադմինիստրատիւ ռեսուրսի կոնսոլիդացիան աւելի արդիւնաւէտ է լինում:
Միւս կողմից, երկու գործընթացների մէկտեղումը եւ դրանց հնարաւոր ձախողումը Էջմիածինը կարող են դարձնել Փաշինեանի քաղաքական ֆիասկոյի խորհրդանիշ»,-գրել է նա:
