Միխայիլ Սինելնիկով-Օրիշակ. «Հայ-ադրբեջանական հակամարտութեան բարդութիւնը հասկանալու համար պէտք չէ հանճար լինել»
«ԱԼԻՔ» – Ռուս քաղաքագէտ եւ ամերիկագէտ Միխայիլ Սինելնիկով-Օրիշակը Alpha News-ի հետ զրոյցում մեկնաբանել է ԱՄՆ-ում Հայաստանի վարչապետ Նիկոլ Փաշինեանի եւ Ադրբեջանի նախագահ Իլհամ Ալիևի հանդիպումը:
«Հարցն այն է՝ արդեօք իսկապէս կը ստորագրւի խաղաղութեան պայմանագիր, այլ ոչ թէ յուշագիր կամ հերթական, այսպէս կոչւած, մտադրութիւնների յայտարարութիւն։ Իսկ մտադրութիւնները, դիւանագիտական լեզւով ասած, միշտ կողմ են համաշխարհային խաղաղութեանը, ամէն լաւ բանի, բայց միայն իւրաքանչիւր կողմ փորձում է այդ «խաղաղութիւնը» ստորագրել իր օգտին։ Եւ հէնց այստեղ են առաջանում հակասութիւնները։
Եթէ իսկապէս խաղաղութեան պայմանագիր լինի, ապա դա, անկասկած, շատ մեծ իրադարձութիւն կը լինի, բաւական կարեւոր իրադարձութիւն այս տարածաշրջանի համար, որը ցոյց կը տայ՝ չնայած հակասութիւնների թնջուկին, այդ հակամարտութիւնները կարելի է լուծել ոչ միայն ռազմական միջոցներով։ Բայց այս իրավիճակը եզակի է նրանով, որ սա յետաձգւած երկարատեւ հակամարտութիւն է, որը բազմիցս բռնկւել եւ մարւել է: Եւ եթէ խաղաղութեան պայմանագիրը կարող է այն մարել թէկուզ միջին հեռանկարով, ապա դա, անկասկած, շատ մեծ յաջողութիւն է։ Բայց այս դէպքում պէտք չէ հանճար լինել, որպէսզի հասկանանք այս ամբողջ բարդութիւնը»,- ասել է Սինելնիկով-Օրիշակը։
Նրա խօսքով՝ Միացեալ Նահանգների ազդեցութիւնն այս հակամարտութեան վրայ ուղղակիօրէն փոքր է, եւ ԱՄՆ-ն այդ ուղղութեամբ որեւէ յատուկ ծախս չի անում, ընդ որում՝ ոչ միայն ֆինանսական, այլեւ քաղաքական առումով։
«Իսկ եթէ յանկարծ յաջողւի կանգնել կողք-կողքի եւ ասել, որ այդ թւում նաեւ Ամերիկայի Միացեալ Նահանգների ջանքերի շնորհիւ հակամարտութիւնը լուծւել է, դա միշտ էլ լաւ է նրանց համար»,- եզրափակել է Սինելնիկով-Օրիշակը։
