Պիոտր Կոլչին. «Փաշինեանին չյաջողւեց համոզել Թեհրանին, որ «Թրամփի ճանապարհը» կը լինի Հայաստանի վերահսկողութեան ներքոյ»
«ԱԼԻՔ» – Ռուս քաղաքագէտ Պիոտր Կոլչինը Alpha News-ին տւած հարցազրոյցում մեկնաբանել է նախագահ Մասուդ Փեզեշքիանի յայտարարութիւնը, թէ «ընդհանուր սահմանին երրորդ ուժերի ներկայութեան վերաբերեալ Իրանի մտավախութիւնները պէտք է փարատւեն»։
Քաղաքագէտի կարծիքով՝ Հայաստանի վարչապետ Նիկոլ Փաշինեանին չյաջողւեց համոզել Թեհրանին, որ «Թրամփի ճանապարհը» կը լինի Հայաստանի վերահսկողութեան ներքոյ։
«Ընդհանուր առմամբ, «Զանգեզուրի միջանցք»-ի շուրջ ստեղծւած ողջ իրավիճակն ակնյայտօրէն Իրանի դէմ է։ Հիւսիսային սահմանի ուղղակի մուտք է ստանում նաեւ Թուրքիան, որի հետ Թեհրանը շատ բարդ յարաբերութիւններ ունի։ Եւ չպէտք է մոռանալ, որ դեռ մի քանի ամիս առաջ Թրամփի հրամանով ամերիկեան աւիացիան ռմբակոծել էր Իրանի օբիեկտները։ Եւ երկրի հիւսիսում գտնւող յենակէտն, ըստ ամենայնի, շատ է անհանգստացնում Իրանի ղեկավարութեանը։
Փաշինեանին ոչ մի կերպ չյաջողւեց համոզել Փեզեշքիանին, որ ամերիկացիները չեն կարողանայ միջանցքով իրենց սպառազինութիւնները հասցնել եւ իրենց զօրակազմերին մատակարարել, ուստի պէտք է սպասել Երեւանի եւ Թեհրանի միջեւ յարաբերութիւնների սառեցման։ Իրանն արդէն մէկ անգամ չէ, որ ապացուցել է՝ յանուն իր անվտանգութեան ապահովման պատրաստ է արմատական միջոցառումների, ուստի պէտք է սպասել նաեւ նրա պաշտպանական ենթակառուցւածքի ուժեղացմանը հիւսիսային սահմաններին եւ զգօնութեան աւելի բարձր մակարդակին՝ Հայաստանի ղեկավարութեան գործողութիւնների նկատմամբ»,- եզրափակել է Կոլչինը։
