Հանրապետութեան նախագահ. «Աշխարհը կարիք ունի արդարութեան վրայ հիմնւած կառավարման»

«ԱԼԻՔ» – Հանրապետութեան նախագահ Մասուդ Փեզեշքիանը ելոյթով հանդէս է եկել Չինաստանի Տեանցզին քաղաքում կայացած Շանհայի համագործակցութեան կազմակերպութեան (ՇՀԿ) գագաթնաժողովին զուգահեռ անց կացւած «Շանհայ+» նիստում: Հաղորդում է «Թասնիմ»-ը:

Իր ելոյթում, նախագահն ընդգծելով համաշխարհայի կառավարման համակարգը վերանայելու անհրաժեշտութիւնը՝ նշել է, որ այսօրւայ աշխարհը կարիք ունի միջազգային համագործակցութեան եւ որոշումների կայացման նոր ծրագրի ու նոր տրամաբանութեան: Ծրագիր, որը, առաջին հերթին, կը թօթափի խնդիրները ուժի միջոցով լուծելու վրայ հիմնւած տրամաբանութիւնից, եւ այն կը փոխարինի հաւասարութեան եւ արդարութեան վրայ հիմնւած տրամաբանութեամբ։

Անդրադառնալով ՇՀԿ-ի երեք տասնամեակների գործունէութեանը՝ Փեզեշքիանն այն բնութագրել է որպէս տարածաշրջանային եւ միջազգային համագործակցութեան յաջողակ ձեւաչափ, որը հիմնւած չէ թշնամիներ ստեղծելու, այլեւ համագործակցութեան, փոխադարձ վստահութեան եւ մշակութային, քաղաքակրթական ու քաղաքական բազմազանութեան նկատմամբ յարգանքի վրայ։

«Այս փորձը ցոյց է տալիս, որ տարբեր երկրներ, նոյնիսկ տարբեր քաղաքական, տնտեսական եւ ռազմական դիրքորոշումներով, կարող են փոխազդել եւ համագործակցել առանց գերազանցութեան ձգտելու եւ հաւասար դիրքերից»,- նշել է նա:

Հանրապետութեան նախագահն ընդգծել է, որ ՇՀԿ-ն, յատկապէս զարգացող երկրների եւ զարգացող տնտեսութիւնների շրջանում, կարող է գործնական պատասխան լինել համաշխարհային մարտահրաւէրներին, այդ թւում՝ տնտեսական անհաւասարութեանը, պատժամիջոցների ճնշմանը, կլիմայի փոփոխութեանը եւ միջազգային անվտանգութեան ճգնաժամերին։

Նա նաեւ ողջունել է «Հարաւի երկրների» հետ համագործակցութեան զարգացումը, մասնաւորապէս՝ ֆինանսների, ներդրումների եւ ենթակառուցւածքների ոլորտներում՝ նշելով. «Իրանը՝ իր գիտական ​​ռեսուրսներով, էներգետիկայով եւ տարանցիկ դիրքով, լիովին պատրաստ է համագործակցել այդ ոլորտներում»։

Փեզեշքիանը նաեւ անդրադարձել է ուժի միջոցով խաղաղութիւն պարտադրելու դառը փորձին՝ յաւելելով. «Անցած տարիներին եւ յատկապէս վերջին մի քանի ամիսներին Իրանի ժողովուրդը զգացել է պատժամիջոցների եւ ռազմական ագրեսիայի հետեւանքները»։

Ընդգծելով Իրանի կողմից իր իրաւոնքների պաշտպանութեան, ինչպէս նաեւ՝ անորոշութիւնները դիւանագիտական ուղիով լուծելու ջանքները՝ նախագահը յայտարարել է. «Միացեալ Նահանգների եւ Եւրոպայի կողմից պատժամիջոցները վերադարձնելու սպառնալիքները՝ առանց պարտաւորութիւնների գործնական կատարման, վկայում են միջազգային արդարադատութեան խախտման մասին:

Խնդիրները լուծելու ռազմական տարբերակը անարդիւնաւէտ է: Վերջին փորձը ցոյց տւեց, որ Իրանի ժողովրդի դիմադրութիւնը չէզոքացրեց ռազմական տարբերակը»:

Նա նաեւ կոչ է արել ՇՀԿ-ին օգտագործել իր կարողութիւններն ու մեխանիզմները՝ կարեւոր գլոբալ հարցերում աւելի արդիւնաւէտ ու յստակ դեր խաղալու, եւ գործողութիւններ ձեռնարկելու, մասնաւորապէս՝ տարածաշրջանային ճգնաժամերում, ինչպիսիք են Արեւմտեան Ասիան եւ Պաղեստինի հարցը։