ԱԳՆ. «Իրանը ՄԱԿ-ի ԱԽ որոշումը համարում է անօրինական եւ պահպանում է պատասխանելու իրաւունքը»

«ԱԼԻՔ» – Արտաքին գործերի նախարարութիւնը հանդէս է եկել յայտարարութեամբ՝ Իրանի դէմ պատժամիջոցները վերականգնելու մասին ՄԱԿ-ի Անվտանգութեան խորհրդի որոշումը համարելով անօրինական, եւ շեշտելով, որ պաշտօնական Թեհրանը պահպանում է պատասխանելու իրաւունքը:

ԱԳՆ-ն Իրանի դէմ պատժամիջոցները վերականգնելուն ուղղւած ՄԱԿ-ի Անվտանգութեան խորհրդում Եւրոպական եռեակ երկրների՝ Մեծ Բրիտանիայի, Ֆրանսիայի եւ Գերմանիայի քայլը համարել է «անօրինական, անհիմն եւ սադրիչ», որը «լրջօրէն խաթարում է շարունակական դիւանագիտական ​​ջանքերը»:

«1. ՄԱԿ-ի Անվտանգութեան խորհրդում երեք եւրոպական երկրների կողմից այսօր (սեպտեմբերի 19-ԽՄԲ.) ձեռնարկւած գործողութիւնը՝ Անվտանգութեան խորհրդի չեղեալ յայտարարւած բանաձեւերի վերականգնման գործընթացն աւարտելու ուղղութեամբ, անօրինական, անհիմն եւ սադրիչ գործողութիւն է, որը լրջօրէն խաթարում է ընթացիկ դիւանագիտական ​​գործընթացները։

2. Այս գործողութեան հետեւանքների ամբողջական պատասխանատւութիւնը, եթէ այն յանգեցնի Իրանի դէմ Անվտանգութեան խորհրդի չեղարկւած բանաձեւերի վերադարձին, ընկնում է Միացեալ Նահանգների եւ երեք եւրոպական երկրների վրայ, որոնք, փաստերը խեղաթիւրելով եւ անհիմն պնդումներով, ճնշում են գործադրել Անվտանգութեան խորհրդի որոշ ոչ մշտական ​​անդամների վրայ՝ միանալու իրենց։

3. Անվտանգութեան խորհրդի պատժամիջոցների վերականգնման գործընթացն աւարտելու այսօրւայ քայլը կայացւել է առանց կոնսենսուսի եւ չնայած Անվտանգութեան խորհրդի մի շարք անդամների լուրջ դիմադրութեանը, ինչը աւելի է խաթարում Անվտանգութեան խորհրդի հեղինակութիւնը եւ համարւում է հարւած դիւանագիտութեանը եւ Միջուկային զէնքերի չտարածման ռեժիմին։

4. Իրանի խաղաղ միջուկային ծրագիրը հիմնւած է իրանական ազգի գիտական ​​եւ տեխնոլոգիական առաջընթացի եւ զարգացման կամքի ու ցանկության վրայ, եւ Իրանի ժողովուրդը վճռական է այս ճանապարհին։ Իրանի Իսլամական Հանրապետութիւնը, շեշտը դնելով իր շահերի եւ իրաւունքների հետապնդման վրայ, այդ թւում՝ դիւանագիտական ​​ճանապարհով, իրաւունք է վերապահում համաչափօրէն արձագանքել որեւէ անօրինական գործողութեան։

5. Իրանի Իսլամական Հանրապետութիւնը կոչ է անում միջազգային հանրութեան բոլոր պատասխանատու անդամներին մերժել Անվտանգութեան խորհրդում երեք եւրոպական երկրների այսօրւայ անօրինական գործողութիւնը եւ ձեռնպահ մնալ դրան որեւէ լեգիտիմութիւն տալուց»,- ասւած է ԱԳՆ հրապարակած յայտարարութեան մէջ:

Նշենք, որ սեպտեմբերի 19-ին ՄԱԿ-ի Անվտանգութեան խորհուրդը մերժել է Իրանի դէմ պատժամիջոցները չվերականգնելու մասին Ռուսաստանի եւ Չինաստանի ներկայացրած բանաձեւի նախագիծը։

Հետեւաբար, ՄԱԿ-ի Անվտանգութեան խորհրդի պատժամիջոցները կը վերականգնւեն։ Գործընթացը կը մեկնարկի սեպտեմբերի 27-ից յետոյ։