«ԱԼԻՔ» – Իրանի Իսլամական Հանրապետութիւնը, յոյս յայտնելով, որ պայմաններ կը ստեղծւեն Գազայի ճնշւած ժողովրդին անյապաղ մարդասիրական օգնութիւններ հասցնելու համար, յայտարարել է այս հարցում մասնակցելու իր պատրաստակամութեան մասին։ Այս մասին ասւած է Գազայի հրադադարի ծրագրի վերաբերեալ Արտաքին գործերի նախարարութեան հրապարակած յայտարարութեան մէջ:
«Իրանի Իսլամական Հանրապետութեան Արտաքին գործերի նախարարութիւնը, յիշեցնելով միջազգային հանրութեան իրաւական եւ բարոյական պատասխանատւութիւնը՝ Գազայում շարունակւող ցեղասպանութեան դէմ պայքարելու համար՝ համաձայն «1948 թ. ՄԱԿ-ի ցեղասպանութեան կանխարգելման եւ պատժի մասին կոնւենցիայի», ինչպէս նաեւ իւրաքանչիւր պետութեան իրաւական եւ բարոյական պարտականութիւնը՝ աջակցելու պաղեստինեան ժողովրդի օրինական եւ արդար պայքարին՝ ինքնորոշման իրաւունքի իրագործման եւ սիոնիստական ռեժիմի օկուպացիայից, ցեղապաշտութիւնից եւ գաղութատիրութիւնից ազատագրւելու ուղղութեամբ, մշտապէս աջակցել է որեւէ նախաձեռնութեան, որը նպատակ ունի դադարեցնել էթնիկ զտումները, պատերազմական եւ մարդկութեան դէմ ուղղւած յանցագործութիւնները Գազայում եւ նպաստել Պաղեստինի ժողովրդի ինքնորոշման իրաւունքի իրագործմանը:
Իրանի Իսլամական Հանրապետութիւնը, հաշւի առնելով այս ծրագրի վտանգաւոր կողմերը եւ դրանց չափերը, եւ կրկին նախազգուշացնելով սիոնիստական ռեժիմի կողմից խոստումներն անտեսելու ու խոչընդոտներ ստեղծելու կրկնւող վարքագծի մասին, յատկապէս՝ այս ռեժիմի ծաւալապաշտական եւ ռասիստական ծրագրերի ֆոնին, այս հարցի վերաբերեալ որեւէ որոշում համարում է Պաղեստինի ժողովրդի եւ Դիմադրութեան իրաւասութեան շրջանակում ւ ողջունում է նրանց որեւէ որոշումը, որը կը ներառի՝ պաղեստինցիների ցեղասպանութեան դադարեցում, սիոնիստ օկուպացիոն բանակի դուրսբերում Գազայից, Պաղեստինի ժողովրդի ինքնորոշման իրաւունքի յարգում, մարդասիրական օգնութեան մուտք եւ Գազայի վերակառուցում։
Գազայում յանցագործութիւնների եւ ցեղասպանութեան դադարեցումը չի վերացնում կառավարութիւնների եւ համապատասխան միջազգային կառոյցների իրաւական ու դատական պատասխանատւութիւնը՝ սիոնիստական ռեժիմի յանցագործութիւնների հետապնդման, պատերազմական յանցագործութիւնների, ցեղասպանութեան եւ մարդկութեան դէմ ուղղւած յանցագործութիւնների կազմակերպիչների ու կատարողների բացայայտման եւ դատապարտման հարցում, ինչն ուղղւած է սիոնիստական ռեժիմի տասնամեակներ շարունակւող անպատժելիութեանը վերջ տալուն։
Իրանի Իսլամական Հանրապետութիւնը, միաժամանակ յոյս յայտնելով, որ կը ստեղծւեն անմիջական մարդասիրական օգնութեան ուղարկման նախապայմանները դէպի ճնշումների ենթարկւած Գազայի ժողովուրդը, յայտարարում է իր պատրաստակամութիւնը՝ մասնակցելու այդ գործընթացին»,- ասւած է ԱԳՆ հրապարակած յայտարարութեան մէջ:
