«ԱԼԻՔ» – Արտգործնախարար Սէյէդ Աբբաս Արաղչին յայտարարել է, որ Իրանի ժողովրդի 12-օրեայ դիմադրութիւնը դարձաւ պատմական շրջադարձային իրադարձութիւն, որը ցոյց տւեց, որ իրանցիները չեն ընդունում ուժի եւ սպառնալիքի լեզուն, իսկ երկրի պաշտպանական պատրաստւածութիւնը խաղաղութեան եւ ազգային անվտանգութեան հիմնական երաշխիքն է։
Ինչպէս յայտնում է «Թասնիմ»-ը՝ Արաղչին իր հեռուստատեսային հարցազրոյցում մեկնաբանել է Իսրայէլի վերջին ռազմական յարձակման հետեւանքները։
Նրա խօսքով՝ սիոնիստական ռեժիմի անհիմն յարձակման հետեւանքով իրանցիների ազգային համախմբւածութիւնն ու հայրենասիրութեան զգացումը է՛լ աւելի են ամրապնդւել։ «Իրանի ժողովուրդը՝ թէ՛ երկրի ներսում, թէ՛ արտասահմանում, զգաց մեր ազգի անարդար տուժած վիճակը։ Մեր միջուկային ծրագիրը ամբողջութեամբ խաղաղ նպատակ ունի եւ գործում է միջազգային իրաւունքին համապատասխան՝ առանց որեւէ շեղման կամ խախտման»,- նշել է նախարարը։
Արաղչին ընդգծել է, որ իշխանութիւնները ճգնաժամի պայմաններում գործեցին ողջախոհ, զուսպ եւ երկխօսութեան վրայ հիմնւած ձեւաչափով, ինչի շնորհիւ հանրութեան շրջանում ուժեղացաւ հայրենասիրութիւնն ու ազգային միասնութիւնը։
Նա յաւելել է. «12 օր տեւած դիմադրութիւնը դարձաւ մեր ժողովրդի պատմութեան առանցքային կէտը։ Ամենակարեւորն այն էր, որ թոյլ չտանք, որպէսզի այդ պատերազմը վերածւի Իրանի դէմ գործողութեան նախադէպի։ Եթէ դիմադրութիւն չլինէր, մեր թշնամիները որեւէ պահի կը փորձէին սպառնալիքով կամ ագրեսիայով պարտադրել իրենց կամքը։ Այժմ այդ դիմադրութիւնը վերածւել է ազգային կապիտալի»։
Արտգործնախարարը նշել է, որ իրանցիները այս պատերազմի ընթացքում ապացուցեցին՝ չեն հրաժարւում իրենց իրաւունքներից եւ չեն վախենում ուժից. «Մեր ժողովուրդը դիմադրեց եւ կանգուն մնաց»։
Նրա խօսքով՝ Յեղափոխութեան առաջնորդը բազմիցս շեշտել է, որ պէտք է գնահատել եւ պահպանել այս ազգային ոգին։ «Մեր համբերատար, բայց անսասան ժողովուրդը մեր երկրի սոցիալական հենասիւնն է, եւ կառավարութիւնը պարտաւոր է արժեւորել նրանց»։
Արաղչին նշել է, որ նախագահը, կառավարութիւնը եւ Զինւած ուժերը մշակել են ծրագրեր՝ ազգային միասնութիւնն ամրապնդելու, սոցիալ-տնտեսական վիճակը բարելաւելու եւ պաշտպանական պատրաստւածութիւնը բարձրացնելու նպատակով։
«Պատրաստւածութիւնը չի նշանակում պատերազմի հաւանականութիւն․ ճիշտ հակառակը՝ այն պատերազմի կանխման գլխաւոր գործօնն է։ Եթէ պատրաստ չես՝ պատերազմը անխուսափելի է, բայց եթէ պատրաստ ես՝ ոչ ոք չի համարձակւի յարձակւել»,- նշել է նա։
Արաղչին նաեւ ընդգծել է, որ վերջին իրադարձութիւնների կրկնութիւնը բացառւած է. «Իւրաքանչիւր սխալ քայլ կարժանանայ համարժէք պատասխանին»։
Նա անդրադարձել է նաեւ Իրանի միջուկային քաղաքականութեանը՝ շեշտելով, որ երկրի անվտանգութեան դոկտրինան չի ներառում միջուկային զէնքի արտադրութիւն։ «Իրանի իրական «միջուկային ռումբը» մեր անկախութիւնն է՝ ուժը «ոչ» ասելու մեծ տէրութիւններին»,– ասել է Արաղչին։
Արտգործնախարարը յաւելել է, որ Իրանը պատրաստ է համագործակցութեան՝ եթէ միւս կողմերը խօսեն յարգանքով ու հաւասարութեան սկզբունքով։ «Մենք բազմիցս ապացուցել ենք, որ ուժին եւ պատժամիջոցներին չենք ենթարկւում, բայց յարգալից վերաբերմունքին պատասխանում ենք նոյն կերպ։ Դրա վառ օրինակը Համատեղ գործողութիւնների համապարփակ ծրագրի բանակցութիւններն էին, որտեղ մենք ցուցաբերեցինք բարի կամք եւ կատարեցինք համաձայնագիրը, մինչդեռ ԱՄՆ-ն խախտեց պայմանաւորւածութիւնները։ Այդ փորձից յետոյ վստահութիւն այլեւս չկայ, բայց դա չի նշանակում, որ մենք հրաժարւում ենք դիւանագիտութիւնից»։
Աւարտելով իր խօսքը՝ Արաղչին ընդգծել է. «Իրանի ժողովուրդը չի ընդունի որեւէ պարտադրանք, բայց պատրաստ է որեւէ խելամիտ եւ արժանապատիւ լուծման»։
