Express. «Քրիստոնեաները հալածանքների են ենթարկւում քրիստոնէութիւն ընդունած առաջին երկրում՝ Հայաստանում»
«ԱԼԻՔ» – Աշխարհի հնագոյն քրիստոնեայ երկրում դաւանանքի ազատութիւնը լուրջ սպառնալիքի տակ է, ասւում է նոր խոշոր զեկոյցում, գրում է բրիտանական Express-ը՝ բացայայտելով զեկոյցի բովանդակութիւնը։
Ինչպէս նշում է բրիտանական լրատւամիջոցը, զեկոյցում Հայաստանի վարչապետ Նիկոլ Փաշինեանը մեղադրւում է Հայ Առաքելական Սուրբ Եկեղեցու վրայ դաժան յարձակման մէջ։
«Նա ձգտել է տապալել նրա առաջնորդ Գարեգին Երկրորդ Ամենայն Հայոց Կաթողիկոսին եւ բանտարկել առաջատար հոգեւորականների ու ծխականների, իսկ արքեպիսկոպոս Միքայէլ Աջապահեանը երկու տարւայ ազատազրկման է դատապարտւել կառավարութեանը քննադատելու համար», – գրում է լրատւամիջոցը։
Բրիտանիայի խորհրդարանի կրօնի ազատութեան հարցերով բազմակուսակցական խորհրդարանական խմբի փոխնախագահ, Փիթերբորոն ներկայացնող լորդ Ջեքսոնն ասել է. «Միտքը, թէ աշխարհի հնագոյն քրիստոնեայ երկրում, ինչպէս նաեւ քաղաքակիրթ եւ ժամանակակից Եւրոպայում հաւատացեալ քրիստոնեաներին բանտ են նետում իրենց հաւատքը պաշտպանելու համար, սարսափելի է։ Հայաստանի քրիստոնէական համայնքները պէտք է կարողանան պահպանել խաղաղ պայմաններում հաւաքւելու եւ երկրպագելու իրաւունքը՝ առանց բռնի ահաբեկման, բանտարկութեան կամ էլ աւելի վատ բանի սպառնալիքի։ Աշխարհը հետեւում է այս քրիստոնեայ համայնքների նկատմամբ կատարւող մարդու իրաւունքների խախտումներին, որոնք պատերազմի մէջ են գտնւում»։
Amsterdam & Partners միջազգային իրաւաբանական ընկերութեան մանրամասն զեկոյցում Փաշինեանը մեղադրւում է նրանում, որ յաջորդ տարւայ ընտրութիւններում իշխանութիւնը պահպանելու իր ձգտման մէջ նա բռնապետի պէս է պահում իրեն։
Նշւում է, որ թէեւ Փաշինեանի ժողովրդականութիւնը վերջին տարիներին կտրուկ անկում է ապրել, Եկեղեցին շարունակում է վայելել բնակչութեան զանգւածային աջակցութիւնը. Հայաստանի երեք միլիոն բնակչութեան 97.5%-ը յայտարարում է իր հաւատարմութեան մասին։
«Ազգային եկեղեցու բարձրաստիճան անդամների եւ դրա կողմնակիցների բացայայտ հալածանքները՝ զայրացուցիչ, անհիմն եւ քաղաքականապէս մոտիւացւած հետապնդումների միջոցով, որոնք ուղղւած են քննադատութիւնը ճնշելուն եւ վերահսկողութիւն հաստատելուն, ոչ պոպուլեար եւ քաղաքականապէս անգրագէտ ռեժիմի արարք է, որը կառչում է իշխանութիւնից ցանկացած անհրաժեշտ միջոցներով»,- ասւում է զեկոյցում։
