ՄԱԳԱՏԷ-ի Կառավարիչների խորհրդի նիստին ընդառաջ. Արաղչին եւ Լաւորովն ընդգծել են Թեհարնի, Մոսկւայի եւ Պեկինի միջեւ շարունակական համագործակցութեան անհրաժեշտութիւնը
«ԱԼԻՔ» – Արտգործնախարար Սէյէդ Աբբաս Արաղչին չորեքշաբթի օրը հեռախօսազրոյց է ունեցել Ռուսաստանի արտգործնախարար Սերգէյ Լաւրովի հետ՝ քննարկելով տարածաշրջանային եւ միջազգային վերջին իրադարձութիւնները։
Ինչպէս հաղորդում է «Թասնիմ»-ը՝ Զրոյցի ընթացքում Արաղչին, անդրադառնալով Աֆղանստանի եւ Պակիստանի միջեւ տեղի ունեցած վերջին բախումներին, ընդգծել է տարածաշրջանում խաղաղութեան եւ կայունութեան հաստատման կարեւորութիւնը՝ կոչ անելով ուժեղացնել երկխօսութիւնն ու համագործակցութիւնը հարեւան երկրների միջեւ։ Նա նշել է նաեւ, որ անհրաժեշտ է շարունակել Իրանի եւ Ռուսաստանի խորհրդակցութիւնները, ինչպէս նաեւ կապերը տարածաշրջանի այլ երկրների հետ՝ խաղաղութեան հասնելու նպատակով։
ԱԳ նախարարն անդրադարձել է նաեւ ԱՄՆ-ի եւ մի շարք եւրոպական երկրների նախաձեռնութիւններին՝ ՄԱԿ-ի Անվտանգութեան խորհրդում շրջանառութեան մէջ դրւած այն նախագծին, որը նախատեսում է միջազգային հսկողութիւն հաստատել Գազայի եւ Պաղեստինի ժողովրդի նկատմամբ։ Արաղչին յայտարարել է, որ նման քայլերը հակասում են Պաղեստինի ժողովրդի անկախութեան եւ ինքնորոշման սկզբունքներին եւ չեն կարող յանգեցնել յաջողութեան։
Իր հերթին՝ Սերգէյ Լաւրովը ողջունել է հեռախօսազրոյցը՝ հաստատելով Մոսկւայի պատրաստակամութիւնը շարունակելու երկկողմ խորհրդակցութիւնները եւ տարածաշրջանային համագործակցութիւնը։ Նա նաեւ կարեւորել է տարածաշրջանի երկրների համատեղ ջանքերը՝ հաւաքական անվտանգութեան պահպանման նպատակով։
Զրուցակիցները անդրադարձել են նաեւ Ատոմային էներգիայի միջազգային գործակալութեան Կառավարիչների խորհրդի առաջիկայ նիստին՝ շեշտելով Թեհրանի, Մոսկւայի եւ Պեկինի միջեւ համակարգման եւ համագործակցութեան շարունակման անհրաժեշտութիւնը։
