ԱՄՆ-ն առաջին անգամ դէմ է քւէարկել նէnնացիզմի դէմ պայքարի վերաբերեալ Ռուսաստանի բանաձեւի փոփոխութեանը
«ԱԼԻՔ» – 2022 թւականից ի վեր առաջին անգամ Միացեալ Նահանգները չի համահեղինակել եւ դէմ է քւէարկել Ռուսաստանի կողմից ներկայացւած «Նացիզմի, նէոնացիզմի եւ այլ գործելակերպերի գովաբանման դէմ պայքար, որոնք նպաստում են ռասիզմի, ռասայական խտրականութեան, քսենոֆոբիայի եւ դրանց հետ կապւած անհանդուրժողականութեան ժամանակակից ձեւերի խթանմանը» բանաձեւի արեւմտեան փոփոխութեանը, հաղորդում է Tert.am-ը ТАСС-ին յղումով:
Սա տեղի է ունեցել ՄԱԿ-ի Գլխաւոր ասամբլեայի Երրորդ կոմիտէի նիստում։
Քննարկւող փոփոխութիւնը, որը նախորդ տարիներին ներկայացւել էր Միացեալ Նահանգների, Աւստրալիայի, Ճապոնիայի եւ այլ երկրների կողմից, պնդում էր, որ Մոսկւան իբր ցանկանում է արդարացնել համատեղ ռազմական գործողութեան անհրաժեշտութիւնը՝ յղում անելով նէոնացիզմի դէմ պայքարին։ 2025 թւականին Վաշինգտոնը ոչ միայն չմիացաւ փոփոխութեանը, այլեւ քւէարկեց դրա դէմ։
Քւէարկութիւնից առաջ ԱՄՆ ներկայացուցիչը Վաշինգտոնի դիրքորոշումը բացատրել է որպէս յանձնաժողովի բազմաթիւ բանաձեւերից հեռու մնալու մտադրութիւն՝ դրանց անարդիւնաւէտութեան պատճառով։
«Միացեալ Նահանգները յստակօրէն յայտարարել է իր մտադրութեան մասին՝ այս տարի Երրորդ կոմիտէի բանաձեւերի մեծ մասից դուրս գալու վերաբերեալ։ ՄԱԿ-ն այլեւս չի կարող թոյլ տալ իր ռեսուրսները վատնել այն հարցերի վրայ, որոնք քիչ կամ ընդհանրապէս ազդեցութիւն չունեն։ Զեկոյցների, համաժողովների եւ բանակցութիւնների քանակը անարդիւնաւէտութիւնից եւ վատնումից անցել է մինչեւ դիսֆունկցիայի աստիճանի, ինչը անհնար է դարձնում կենսականօրէն կարեւոր աշխատանքի կատարումը։ Հետեւաբար, Միացեալ Նահանգները «ոչ» կը քւէարկի բանաձեւի այս փոփոխութեան վերաբերեալ»,- յայտարարել է ամերիկացի դիւանագէտը։
Ռուսաստանի ԱԳՆ մարդու իրաւունքների բազմակողմ համագործակցութեան վարչութեան տնօրէն Գրիգորի Լուկեանցեւը լրագրողների հետ զրոյցում սա անւանել է դրական արդիւնք։
«Մենք նկատել ենք ԱՄՆ պատւիրակութեան քւէարկութեան փոփոխութիւնը։ Մենք կարծում ենք, որ սա փոփոխութեան վերաբերեալ քւէարկութեան դրական արդիւնքներից մէկն է», – ասել է նա։
