Գառնիկ Դանիէլեան. «Քաղաքացիները շատ սթափ են գնահատում իրավիճակը»
Տեղի ունեցաւ «Հայաստան» խմբակցութեան հերթական մարզային հանդիպումը՝ այս անգամ Աբովեան քաղաքում։ Յայտնում է ԱԺ պատգամաւոր Գառնիկ Դանիէլեանը.
«Հանդիպումն անցաւ լեփ-լեցուն դահլիճում: Մեր հայրենակիցներն անմիջական մթնոլորտում հնարաւորութիւն ունեցան բարձրաձայնելու իրենց յուզող խնդիրները, որոնց լուծմանն ենք ուղղելու մեր ջանքերը:
Գործընկերներիս հետ ներկայացրինք այս իշխանութիւնների կառավարման 7 տարիների ընթացքում տեղի ունեցած աղէտները՝ Արցախի հայաթափումից, արտաքին քաղաքականութեան ձախողումից մինչեւ ներազգային պառակտման եւ ազգային ինքնութեան ոչնչացմանն ուղղւած հետեւողական քաղաքականութիւն։
Պէտք է նշել, որ մեր քաղաքացիները շատ սթափ են գնահատում իրավիճակը։ Խորապէս ըմբռնում են մեր պետականութեան առջեւ ծառացած մարտահրաւէրներն ու դրանց աղէտալի հետեւանքները՝ այս իշխանութիւնների վերարտադրման պարագայում։
Մի քանի ամիս յետոյ իւրաքանչիւր քաղաքացի հնարաւորութիւն է ունենալու արտայայտել իր դիրքորոշումը՝ ընտրատեղամասեր գնալով։ Պէտք է գիտակցել, որ անտարբերութիւնը, ապատիան եւ յուսալքութիւնը ձեռնտու են միայն այս իշխանութիւններին։
Մարզային հանդիպումները շարունակական բնոյթ կը կրեն։ Առաջիկայում գործընկերներիս հետ կը լինենք նաեւ ՀՀ միւս մարզերում՝ ոչ միայն ներկայացնելու ստեղծւած իրավիճակը, այլև լսելու մեր հայրենակիցների մտահոգութիւններն ու առաջարկները։
Ձեր վստահութիւնն ու ջերմ ընդունելութիւնը մեզ պարտաւորեցնում է աւելին անելու, սիրելի՛ հայրենակիցներ»,- նշել է նա:
