Իրանն արձագանքել է Գազայի վերաբերեալ ՄԱԿ-ի 2803 բանաձեւին

«ԱԼԻՔ» – ՄԱԿ Անվտանգութեան խորհրդի՝ Գազայի վերաբերեալ նոր 2803 բանաձեւը յայտնւել է միջազգային քննարկումների առանցքում։ Իրանի Իսլամական Հանրապետութեան արտաքին գործերի նախարարութիւնը այս կապակցութեամբ հրապարակել է ծաւալուն յայտարարութիւն՝ ներկայացնելով պաշտօնական Թեհրանի գնահատականները, վերապահումներն ու մտահոգութիւնները։ ԱԳՆ-ն ընդգծել է՝ բանաձեւի մի շարք դրոյթներ կարող են լրջօրէն ազդել Պաղեստինի ապագայի վրայ։

Ընդգծելով, որ Թեհրանը պատրաստ է աջակցել որեւէ տարածաշրջանային կամ միջազգային նախաձեռնութեան, որը կօգնի դադարեցնել Գազայի եւ պաղեստինեան ժողովրդի նկատմամբ իրականացւող ցեղասպանութիւնն ու ռազմական յանցագործութիւնները՝ ԱԳՆ-ն լուրջ մտահոգութիւն է յայտնել Անվտանգութեան խորհրդի նոր՝ 2803 բանաձեւի բովանդակութեան վերաբերեալ՝ նշելով, որ այն պարունակում է մի շարք խնդիրներ, որոնք կարող են խաթարել պաղեստինցիների հիմնարար եւ անշրջանցելի իրաւունքները։

Յայտարարութեան տեքստում յատուկ ընդգծւած է, որ բանաձեւի զգալի հատւածը հակասում է պաղեստինեան ժողովրդի օրինական պահանջներին։ Պաշտօնական Թեհրանի գնահատմամբ՝ փաստաթուղթը Գազայի նկատմամբ ստեղծում է ինչ-որ «խնամակալական համակարգ», ինչը կարող է զգալիօրէն սահմանափակել պաղեստինեան ժողովրդի ինքնորոշման իրաւունքը եւ հեռու տանել անկախ պետութեան ստեղծման հեռանկարից՝ մայրաքաղաք Երուսաղէմով։

ԱԳՆ-ն նաեւ մատնանշում է, որ բանաձեւի հեղինակները կարծես կանխամտածւած կերպով շրջանցել են ՄԱԿ-ի դերը՝ ոչ միայն անտեսելով Կազմակերպութեան իրաւական հիմքերը, այլեւ մոռացութեան մատնելով Պաղեստինի հարցին վերաբերող նախորդ բանաձեւերը. «Նման մօտեցումը կարող է թուլացնել միջազգային իրաւունքի գործելաոճը եւ վտանգաւոր նախադէպ ստեղծել ապագայ բանակցութիւնների համար»։

Յայտարարութեան մէջ յստակ նշւած է, որ Իրանը բացայայտ մերժում է Գազայի օկուպացիայի որեւէ օրինականացումը, տարածքի հնարաւոր բաժանումը կամ Պաղեստինի միասնական աշխարհագրութեան խաթարումը։ Նշւած է, որ նման մօտեցումը հակասում է ոչ միայն պաղեստինեան ժողովրդի իրական շահերին, այլեւ ամբողջ տարածաշրջանի խաղաղութեան ու կայունութեան ակնկալիքներին։

Իրանը պահանջել է, որ միջազգային խաղաղապահ կամ դիտորդական ուժերը /եթէ դրանք տեղակայւեն/, գործեն բացառապէս ՄԱԿ-ի յստակ վերահսկողութեան ներքոյ, եւ որ նրանց պարտականութիւնները պէտք է սահմանափակւեն միայն հրադադարի պահպանման վերահսկմամբ եւ մարդասիրական օգնութեան անվտանգ մուտքի ապահովմամբ։

Յայտարարութեան մէկ այլ առանցքային շեշտադրում ուղղւած է միջազգային հանրութեանը։ Թեհրանը պնդում է, որ յատկապէս հրադադարի երաշխաւոր երկրները պարտաւոր են գործնական քայլեր ձեռնարկել՝ ստիպելու Իսրայէլին դադարեցնել օկուպացիան եւ դուրս բերել զօրքերը Գազայի տարածքից՝ ընդգծելով, որ ոչ մի որոշում, ոչ մի քաղաքական փաստաթուղթ չի կարող խաթարել այս պահանջի իրաւական եւ քաղաքական ուժը։

Յայտարարութիւնում մէկ անգամ եւս շեշտւած է, որ պաղեստինեան դիմադրութիւնն օկուպացիայի, ցեղապաշտութեան եւ գաղութատիրութեան դէմ միջազգային իրաւունքի տեսանկիւնից օրինական է։ Դա, ԱԳՆ-ի ձեւակերպմամբ, պաղեստինեան ժողովրդի բնական եւ անխուսափելի արձագանքն է շարունակւող բռնութիւններին եւ տարածքային կորուստներին։

Արտգործնախարարութիւնը կարեւորել է նաեւ Պաղեստինի ապագայի շուրջ ներքին պաղեստինեան համախմբման անհրաժեշտութիւնը՝ նշելով, որ Պաղեստինի վարչակարգի ձեւաւորման, կառավարման եւ ապագայ ուղղութիւնների վերաբերեալ որեւէ որոշում պէտք է ընդունւի բացառապէս պաղեստինեան ուժերի համաձայնութեամբ, եւ որ արտաքին ճնշմամբ կամ պարտադրմամբ ձեւաւորւած լուծումները սկզբունքօրէն մերժելի են։

ԱԳՆ-ն կրկին կոչ է արել միջազգային հանրութեանը արդիւնաւէտ ճնշում գործադրել Իսրայէլի վրայ՝ անյապաղ դադարեցնելու բռնութիւնները, մարդու իրաւունքների խախտումները եւ օկուպացիան՝ շեշտելով, որ միայն այդ կերպ հնարաւոր կը լինի ապահովել պաղեստինեան ժողովրդի հիմնարար իրաւունքների իրականացումը։