Մեր կոչն է տիրադաւերին վերադառնալ կանոնական դաշտ. Միքայէլ եւ Բագրատ Սրբազաններ

Միքայէլ եւ Բագրատ Սրբազանները դատապարտող յայտարարութեամբ են հանդէս եկել։

«Նոյեմբերի 27-ին հրապարակւած յայտարարութիւնը, դրան յաջորդած խայտառակ հանդիպումը մեզ ստիպում են խոր ցաւով կատարել հետեւեալ յայտարարութիւնը.

ա) դատապարտում ենք հերձւած ստեղծելու այս փորձը եւ ընթացքը դաւադիր, գաղտագողի վարքով,

բ) դատապարտում ենք աշխարհիկ իշխանութիւններին, այն էլ հայրենադաւ եւ դաւաճան, ներքաշելու ներեկեղեցական հարցերի լուծման մէջ։

գ) մեր կոչն է տիրադաւերին վերադառնալ կանոնական դաշտ եւ իրենց յուզող հարցերը բարձրացնել ներեկեղեցական տիրոյթում ու ատեաններում,

դ) դիմում ենք Վեհափառ Հայրապետին, անհրաժեշտ ենք նկատում հրաւիրել եպիսկոպոսաց ժողով քննարկելու առկայ հարցերը եւ պատրաստելու Ազգային եկեղեցական ժողովի օրակարգը։ Միեւնոյն ժամանակ պնդելով ապահովել ապօրինի ազատազրկւած երեք սրբազաններիս մասնակցութիւնը:

Աղօթում ենք, յոյս եւ համոզում ենք յայտնում, որ Վեհափառ Հայրապետն ամուր եւ անսասան կը մնայ, եւ որ Սուրբ Հոգու առաջնորդութեամբ մեր Սուրբ եկեղեցին կը յաղթահարի չարի այս փորձութիւնը եւս: «Բայց այս ամէնից աւելի յաղթական ենք դուրս գալիս նրա շնորհիւ, ով մեզ սիրեց, որովհետեւ համոզւած եմ, որ ո՛չ մահը, ո՛չ կեանքը, ո՛չ հրեշտակները, ո՛չ իշխանութիւնները, ո՛չ ներկայ եւ ո՛չ գալիք բաները, ո՛չ զօրութիւնները, ո՛չ բարձրութիւնը, ո՛չ խորութիւնը, ոչ էլ որեւէ ուրիշ արարած չի կարող մեզ բաժանել Աստծու սիրուց, որ մեր Տէր Քրիստոս Յիսուսով է» (Հռոմ. ը- 37:39)»:

News.am