Արաղչի. «ԱՄՆ-ը պատրաստ չէ արդար ու փոխշահաւէտ բանակցութիւնների»
ԱԳ նախարար Սէյէդ Աբբաս Արաղչին ընդգծել է, որ վերջին գնահատումներով «ԱՄՆ-ը պատրաստ չէ փոխադարձ յարգանքի եւ հաւասարութեան հիման վրայ իրական ու շահեկան բանակցութիւնների»։ Նա նշել է, որ «մօտեցումը, որ ուզում են թելադրել, բանակցութիւն չէ», եւ աւելացրել. «Մենք նա չեմք, ով ականջը տալիս է ուրիշների թելադրանքին»:
Արաղչին, Ճապոնական «Քիոդօ» լրատւական գործակալութեանը տւած բացառիկ հարցազրոյցի ժամանակ ընդգծել է, որ Իրանի միջուկային ենթակառոյցների ռմբակոծումը լրջագոյն խախտում էր միջազգային իրաւունքի ողջ պատմութեան առումով, եւ որ նման երեւոյթի համար աշխարհում չկայ ոչ մի նախադէպ, իսկ գոյութիւն չունի նաեւ ոչ մի ստանդարտ ընթացակարգ այդ արարաքը պատժելու համար:
ԱԳ նախարարը յայտնել է, որ իրանական կողմը Ատոմային էներգիայի միջազգային գործակալութեան հետ կը շարունակի քննարկումները՝ պատերազմի հետեւանքով վնասւած կառոյցներում նոր, յատուկ ստուգումների ձեւաչափի շուրջ համաձայնութեան գալու նպատակով։ Սակայն Եւրոպական տրոյկայի եւ ԱՄՆ-ի կողմից Snapback մեխանիզմի առաջմղումը, ըստ նախարարի, ոչ միայն չունի օրինական տրամաբանութիւն, այլեւ վնասեց Կահիրէի համաձայնութեանը:
ԱՄՆ-ը թելադրողի դերում է ուզում երեւալ, ոչ թէ բանակցողի
Արաղչին յիշեցրել է, որ Վաշինգտոնի վարքագծի մէջ չի նկատել պատրաստակամութիւն՝ իրական եւ փոխշահաւէտ բանակցութեան համար:
«Երբ համոզւենք, որ ԱՄՆ-ը պատրաստ է արդար ու հաւասարակշռւած գործընթացի, երկխօսութիւնը կարող է վերսկսւել։ Բայց նրանք ուզում են թելադրել, իսկ ես թելադրանք չեմ ընդունում»։
Իրանն, ըստ դիւանագիտութեան կորպուսի ղեկավարի, կը շարունակի իր խաղաղ նպատակներով միջուկային ծրագիրը. «Տեխնոլոգիան ու գիտութիւնը՝ տեղական է, եւ դրա համար շատ բարձր գին ենք վճարել՝ պատերազմ, պատժամիջոցներ, հազարաւոր զոհեր եւ գիտնականների սպանութիւններ։ Սա ազգային արժանապատւութեան հարց է եւ վաճառքի ենթակայ չէ»։
Մինչեւ անվտանգային մտահոգութիւնները չվերանան, ստուգայցերը չեն լինելու
Արաղչին նշել է, որ ՄԱԳԱՏԷ-ի հետ ԻԻՀ-ի կապը կը պահպանւի, սակայն ռազմական սպառնալիքները, ռմբակոծումի հետեւանքները եւ պայթիւնավտանգ մնացորդներն ստեղծել են այնպիսի իրավիճակ, որ առանց նոր համաձայնեցւած շրջանակի, չեն կարող վերսկսւել ստուգայցերն ու ստուգումները։
Ճապոնիայի հետ համագործակցութեան հեռանկարները
ԱԳ նախարարը դրական է գնահատել Թեհրան–Տոկիօ կապերը՝ ընդգծելով, որ Ճապոնիան ունի եզակի փորձ միջուկային վնասների, Ֆուկուսիմայի ճգնաժամի եւ ատոմային անվտանգութեան ոլորտում։ Իրանի համոզմամբ՝ պատերազմական վնասւած ենթակառոյցների անվտանգութեան բարձրացման մէջ Ճապոնիան կարող է լինել վստահելի գործընկեր։
Բանակցութիւնների ապագան՝ պայմանաւորւած ԱՄՆ-ի քայլերով
Արաղչին հաստատել է, որ Թեհրանը պատրաստ է քննարկումների. «Եթէ ԱՄՆ-ը ընդունի Իրանի անքակտելի իրաւունքը՝ խաղաղ միջուկային տեխնոլոգիայի, ներառեալ ուրանի հարստացման, եւ ապահովի պատժամիջոցների վերացումը՝ փոխադարձ վստահութեան հիման վրայ, ապա մենք եւս պատրաստ ենք բանակցութիւնների։ Ճշմարտութիւնը մէկ բան է՝ Իրանը երբէք չի գնացել միջուկային զէնք ստեղծելու ճանապարհով։ «Մնացածը ժամանակի հարց է, եւ որպէս առաջընթաց՝ կը ձեւաւորւի փոխադարձ վստահութեան հիմքում»,- նշել է նա:
Ըստ նախարարի՝ այժմ վստահութիւնը պարտաւոր են վերականգնել ոչ թէ իրանցիները, այլ նրանք, ովքեր անօրինական յարձակումներով քանդեցին վստահութիւնն ու ռմբակոծեցին խաղաղ նպատակներով հիմնւած օբիեկտները:
Անդրադառնալով միջազգային հանրութեան մէջ սերմանւող մտահոգութիւններին՝ Արաղչին նշել է․ «Նրանք պարտաւոր են ձեւաւորւել վստահութեան մթնոլորտ, որպէսզի մենք եւս հնարաւորութիւն ունենանք շարունակել մեր անքակտելի իրաւունքների հիման վրայ՝ խաղաղ ծրագրերի իրականացմամբ:
Ամփոփելով՝ Արաղչին ընդգծել է՝ Իրանի միջուկային ծրագրի շարունակութիւնը մեր ժողովրդի համար պատւի եւ ազգային արժանապատւութեան հարց է, որի հարցում մէկ քայլ անգամ չենք նահանջելու:
