Պեսկով. «ՆԱՏՕ-ի գլխաւոր քարտուղարը անպատասխանատու յայտարարութիւններ է անում»
«ԱԼԻՔ» – «ՆԱՏՕ-ի գլխաւոր քարտուղար Մարկ Ռիւտէն անպատասխանատու յայտարարութիւններ է անում, պարզապէս չի հասկանում, թէ ինչի մասին է խօսում»: Այս մասին ըստ Tert.am-ի՝ ասել է ՌԴ նախագահի մամուլի խօսնակ Դմիտրի Պեսկովը՝ մեկնաբանելով ՆԱՏՕ-ի գլխաւոր քարտուղարի՝ Ռուսաստանի հետ պատերազմին պատրաստւելու անհրաժեշտութեան մասին խօսքերը։
«Մենք, փառք Աստծոյ, մեծացել ենք մի երկրում, որտեղ խնամքով պահպանում ենք յիշողութիւնն այն մասին, թէ ինչ յաջողւեց անել Եւրոպան ֆաշիզմից փրկելու համար»,- նշել է նա։
Նշենք, որ աւելի վաղ ՆԱՏՕ-ի գլխաւոր քարտուղար Մարկ Ռիւտէն յայտարարել էր, որ դաշինքը կարող է դառնալ Ռուսաստանի յաջորդ թիրախը։
Նա նշել էր, որ դաշինքի չափազանց շատ անդամներ «չեն զգում իրավիճակի հրատապութիւնը» եւ կարծում են, որ «ժամանակը մեր օգտին է»։ ՆԱՏՕ-ի գլխաւոր քարտուղարը ընդգծել էր, որ դաշնակիցների պաշտպանական ծախսերը եւ արտադրութիւնը պէտք է արագ աճի, եւ որ նրանց զինւած ուժերը պէտք է ունենան անվտանգութիւնն ապահովելու համար անհրաժեշտ ամէն ինչ։
Ռիւտէն յաւելել էր. «Հակամարտութիւնը մեր շեմին է»։ Նա կոչ էր արել ՆԱՏՕ-ի երկրներին միասնութեան եւ վճռականութեան, ինչպէս նաեւ պաշտպանութեան մէջ ներդրումներ անել։
