Իշխան Սաղաթէլեան. «Որեւէ կենտրոնի` Հայաստանի ներքին գործերին միջամտութիւնը մեզ համար անընդունելի է»
«ԱԼԻՔ» – «Երէկ (դեկտեմբերի 15-ԽՄԲ.) Եւրոպական Միութեան դիւանագիտութեան ղեկավար Կայա Կալասը յայտարարել է, որ Հայաստանի իշխանութիւնները դիմել են ԵՄ-ին, խնդրելով աջակցութիւն ընտրութիւնների ժամանակ Մոլդովայի օրինակով կամ փորձով»: Այս մասին ֆէյսբուքի իր էջի ուղիղ եթերում յայտարարել է ՀՅԴ Հայաստանի ԳՄ ներկայացուցիչ, ՀՀ ԱԺ «Հայաստան» խմբակցութեան պատգամաւոր Իշխան Սաղաթէլեանը։
«Ելնելով այս հանգամանքից, պէտք է արձանագրենք երեք փաստ: Առաջինը, սա ուղիղ միջամտութիւն է արտաքին ուժերի կողմից Հայաստանի ներքին գործերին։ Երկրորդ, օրւայ վարչախումբը քաջ գիտակցում է, որ այլեւս չունի ժողովրդի կողմից աջակցութիւն եւ նոյնիսկ պետական վարչական ուժային ռեսուրսները բաւարար չեն իրենց վերարտադրութիւնը ապահովելու համար, եւ երրորդ, ելնելով այս իրավիճակից, իրենք արտաքին ուժերի միջամտութեամբ, հէնց Մոլդովայի օրինակով, պատրաստւում են առաջիկայ ընտրութիւններին չէզոքացնել ընդդիմադիր ուժերի մասնակցութիւնը։
Սա է իրական պատկերը Նիկոլ Փաշինեանի իշխանութեան ժողովրդավարութեան անկախութեան եւ ինքնիշխանութեան մասին։ Ամենեւին չզարմանաք եթէ առաջիկայում Ալիեւը եւ Էրդողանը յայտարարեն, որ տարածաշրջանում կայունութեան եւ խաղաղութիւն հաստատելու համար Նիկոլ Փաշինեանը դիմել է իրենց, ակնկալելով նրանց օգնութիւնն ու աջակցութիւնը Հայաստանում Փաշինեանի վերարտադրութիւնը ապահովելու համար։
Իրականում Հայաստանի եւ հայ ժողովրդի ճակատագիրը պէտք է որոշի հայ մարդը եւ որեւէ արտաքին միջամտութիւն որեւէ արտաքին կենտրոնից մեզ համար անընդունելի է եւ թոյլ չենք տալու»,- յայտարարել է նա։
