Վարուժան Գեղամեան. «Առաջիկայ 6 ամիսների ընթացքում տեսնելու ենք «հայ-թուրքական սիլիբիլիների» դրւագներ, դրանք փաստացի uպառնալիք են ու թուրքական միջամտութիւն մեր ինքնիշխանութեանը»
«ԱԼԻՔ» – «Մի քանի օր առաջ Թուրքիայի նախագահ Ռ. Թ. Էրդողանը ուղիղ տեքստով յայտարարել է. «Թուրքիան միւս տարւանից սկսած որոշ խորհրդանշական քայլեր կը ձեռնարկի Հայաստանի հետ յարաբերութիւնների կարգաւորման հարցում»»։ Այս մասին թելեգրամեան իր ալիքում գրել է թուրքագէտ Վարուժան Գեղամեանը:
«Խորհդանշական քայլեր կարող են լինել, օրինակ, ցուցադրական հանդիպումները, թուրքերի կողմից աւիրւած Անիի կամուրջի վերականգնումը, մէկ-երկու մեր ականջին քաղցրահունչ ուղերձ, սահմանային անցակէտի հազւադէպ բացում կամ էլ ինչ-որ հումանիտար օգնութիւն։ Այսինքն՝ ոչ թէ իրական հարեւանութիւն ու համագոյացութիւն, այլ հէնց ցուցադրական, բայց բովանդակազուրկ քայլեր՝ ուղեկցւելով սիրուն ու գոյնզգոյն լուսանկարներով ու վիդէոներով։
Այդ խորհրդանշական քայլերը ունեն մէկ նպատակ. ստեղծել պատրանք, որ թուրք-ադրբեջանական տանդեմը խաղաղութիւն է ուզում եւ որ Հայաստանի դէ-ֆակտօ իշխանութեան քաղաքականութիւնը ճիշտ է, հետեւաբար՝ նրանք պէտք է վերընտրւեն։ Պատահական չէ, որ մեկնաբանելով Թուրքիայի վերջին շաբաթների «հայկական քաղաքականութիւնը»՝ թուրքական մեդիան ուղիղ գրում է, որ այս ամէնը «աջակցութեան ընտրական ժեստ է» փաշինեանին (տե՛ս կից այդպիսի մի օրինակ)։ Հէնց այս համատեքստում է պէտք դիտարկել, օրինակ, «ադրբեջանական բենզինի» առաքումը, որը գովազդւում է որպէս «խաղաղութեան» առյաւատչեայ։ Մինչդեռ դա Հայաստանին թուրքական էներգիայից կախման մէջ գցելու քաղաքականութեան սկիզբն է։
Հետեւաբար առաջիկայ վեց ամիսների ընթացքում մենք բոլորս տեսնելու ենք «հայ-թուրքական սիլիբիլիների» բազմաթիւ դրւագներ, սակայն դրանք ոչ միայն լինելու են բովանդակազուրկ, այլեւ փաստացի սպառնալիք են ու թուրքական միջամտութիւն մեր ինքնիշխանութեանը։ Այդ գործում թուրքական կողմին օգնելու են ոչ միայն տեղական քարոզիչները, այլ բարի դէմքով բազմաթիւ եւրոպացիներ, որոնք «աւետելու են» Հայաստանի թուրքացումը։
Թուրքիան վարում է Հայաստանի դէմ հիբրիդային պատերազմ՝ փորձելով մեր պետութիւնը դարձնել իր ազդեցութեան գօտի։ Ուստի պէտք է զգօն լինենք, չտրւենք այդ քարոզին, բացայայտենք ու բացատրենք թուրքական իրական քաղաքականութեան իրական նպատակները։ Եկեղեցու պաշտպանութիւնից մինչեւ քաղաքական հարցեր պէտք է բարձրաձայնել, կազմակերպել ու կազմակերպւել»,- գրել է Գեղամեանը:
