ԱԺ «Հայաստան» խմբակցութիւնը բոյկոտեց ԱԺ արտահերթ նիստը եւ լքեց դահլիճը

Ազգային ժողովի արտահերթ նիստի շրջանակում «Ընտրական օրէնսգիրք սահմանադրական օրէնքում փոփոխութիւններ եւ լրացումներ կատարելու մասին» նախագծի քննարկման ժամանակ «Հայաստան» խմբակցութեան անունից ելոյթ ունեցաւ պատգամաւոր Արծւիկ Մինասեանը:

Ըստ պատգամաւորի՝ արտահերթ նիստի մեկնարկից առաջ՝ խորհրդի նիստի ժամանակ, առաջարկ է արւել հետաձգելու նախագծի քննարկումը:

«Առաջարկութիւն ներկայացրինք հետաձգելու ԱԺ արտահերթ նիստը, որպէսզի թէ՛ միջազգային ներկայացուցիչների ներգրաւման, թէ՛ դիտորդական առաքելութիւն իրականացնող բոլոր կազմակերպութիւնների ներգրաւման, նաեւ հանրային քննարկման միջոցով ունենանք օրէնսդրական փոփոխութեան վերաբերեալ պատշաճ քննարկումներ եւ դրա հիման վրա՝ նորմալ եզրակացութիւն, սակայն մերժում ստացանք, ոչ միայն մերժում…

Անընդունելի ենք համարում նման վարքագիծը, սա հերթական փորձն է՝ ընտրական գործընթացներն ամբողջութեամբ իշխանութեան վերահսկողութեան տակ բերելուն եւ ընտրակեղծիքներն օրինականացնելուն միտւած: Այս ամէնն ընդունելի չէ, մերժելի է»,- ասաց պատգամաւորը՝ յայտարարելով, որ «Հայաստան» խմբակցութիւնը չի մասնակցելու քննարկմանը, եւ լքեցին դահլիճը:

Այս համատեքստում ԱԺ նախագահ Ալէն Սիմոնեանն անդրադարձաւ խորհրդարանական ընդդիմութեան բացակայութիւններին:

«Չմասնակցելու հետ կապւած՝ պիտի բացակաները ներկայացնեմ: Ասեմ, որ ԱԺ գումարումից այս կողմ՝ 4,5 տարւայ ընթացքում, ունեցել ենք 244 նիստ, եւ, այսօր, օրինակ, պարոն Իշխան Սաղաթէլեանի 100-րդ յոբելեանական բացակայութիւնն է: Շնորհաւորում ենք»,- ասաց ԱԺ խօսնակը, եւ դահլիճում ծափեր հնչեցին:

Յիշեցնենք, որ ԱԺ արտահերթ նիստում քննարկւում է «Ընտրական օրէնսգիրք» սահմանադրական օրէնքում փոփոխութիւնների նախագիծը, որը վերաբերում է դիտորդների անաչառութեանն ու քաղաքական չէզոքութեանը։ Այն ներկայացրել է ՔՊ–ն հրատապ ձեւով, քանի որ առաջիկայում սպասւում են ընտրութիւններ։

News.am