«ԱԼԻՔ» – Իրանի Իսլամական Հանրապետութեան կառավարութիւնը յայտարարութեամբ խստօրէն դատապարտել է Եւրամիութեան արտաքին գործերի նախարարների որոշումը՝ Իսլամական Յեղափոխութեան պահապանների կորպուսի (Սեփահ) վերաբերեալ։
Կառավարութեան յայտարարութեան մէջ նշւում է, որ ԵՄ-ի այս քայլը յուզական, ոչ կառուցողական եւ ոչ իրաւական մօտեցում է՝ ուղղւած Իրանի ազգային ինքնիշխանութեան կարեւորագոյն կառոյցներից մէկի դէմ, որն առանցքային դեր է ունեցել տարածաշրջանային կայունութեան պահպանման եւ ահաբեկչական խմբաւորումների դէմ պայքարում։
Յայտարարութեան համաձայն՝ ԻՅՊԿ‑ն իրանցիների համար համարւում է Սադդամի ռեժիմի ագրեսիայի, ինչպէս նաեւ «Ալ-Քաիդայի» եւ «ԴԱԷՇ»-ի նման ահաբեկչական խմբերի դէմ պայքարում՝ անձնազոհութեան խորհրդանիշ։ Կառավարութիւնը շեշտել է, որ ԻՅՊԿ‑ն ոչ միայն ռազմական պաշտպանական կառոյց է, այլեւ հայրենասիրական համակարգ, որը նպաստում է ազգային անվտանգութեան ամրապնդմանն ու տարածաշրջանային համագործակցութեանը։
Իրանի կառավարութեան յայտարարութեան մէջ ընդգծւել է, որ ազգային-կրօնական կառոյցներն ու ազգային ինքնիշխանութեան եւ տարածքային պաշտպանութեան խորհրդանիշերը մշտապէս վայելել եւ շարունակելու են վայելել պետութեան բոլոր կառոյցների եւ ժողովրդի աջակցութիւնը։
