Իրանը դատապարտել է Իսրայէլի շարունակական ագրեսիան խրախուսող ԱՄՆ դեսպանի յայտարարութիւնները
Իրանի Իսլամական Հանրապետութեան ԱԳՆ ներկայացուցիչը խստօրէն դատապարտել է ԱՄՆ դեսպանի յայտարարութիւնները, որոնցով նա պաշտպանել է սիոնիստական վարչակարգի կողմից արաբա‑իսլամական տարածքների բռնազաւթման «թոյլատրելիութիւնը»՝ «Նեղոսից մինչեւ Եփրատ» գաղափարի մասին յիշեցնելով։
ԻՌՆԱ‑ի հաղորդմամբ՝ Իսմայիլ Բաղային «X» սոցիալական հարթակում գրառում հրապարակելով անդրադարձել է Իսլամական երկրների համագործակցութեան կազմակերպութեան քարտուղարութեան տարածած յայտարարութեանը, եւ ընդգծել՝ որ Իրանի Իսլամական Հանրապետութիւնը՝ համահունչ ԻՀԿ‑ի դիրքորոշմանը, դատապարտում է այս «ծայրայեղականութիւն յիշեցնող բառախաղերը»։
Բաղայիի խօսքով՝ նման յայտարարութիւնները սիոնիստական օկուպացիոն վարչակարգին քաջալերում են շարունակելու յանցագործութիւնները պաղեստինցի ժողովրդի դէմ եւ ընդլայնելու տարածաշրջանի երկրների նկատմամբ շարունակական նկրտումները։
Աղբիւրի համաձայն ԱՄՆ դեսպան Մայք Հաքաբին, բռնազաւթւած Պաղեստինի տարածքներում լրագրողների հետ ճեպազրոյցի ժամանակ պնդել է, թէ Իսրայէլն ունի «ի վերուստ տրւած իրաւունք»՝ տիրելու ամբողջ Մերձաւոր Արեւելքին կամ առնւազն դրա զգալի մասին։
