Հայկական ընդդիմութիւնը զգուշացնում է. ԱՄՆ ներկայութիւնը Իրանի սահմանին Կովկասը կը տանի ճգնաժամի

Հայկական ընդդիմութիւնը զգուշացրել է Իրանի սահմաններին ԱՄՆ ներկայութեան անվտանգութեան հետեւանքների մասին՝ ընդգծելով, որ Վաշինգտոնի միջամտութիւնը Հարաւային Կովկասում կարող է լուրջ սպառնալիք ներկայացնել Հայաստանի տարածքային ամբողջականութեան եւ տարածաշրջանային կայունութեան համար: Իրանին սահմանակից Սիւնիքի մարզի «Ուժեղ Հայաստան» ընդդիմադիր կուսակցութեան առաջնորդ Նարեկ Կարապետեանը յայտարարել է, որ ԱՄՆ-ի հետ կապւած ընկերութիւնների կամ ուժերի տեղակայումը տարածաշրջանում՝ իրանական ուժերի մօտ, կը մեծացնի լարւածութեան եւ անկայունութեան սրման ռիսկը:

Անդրադառնալով Հայաստանի եւ Իրանի սահմանների միջեւ շատ կարճ հեռաւորութեանը՝ նա ասաց, որ Հարաւային Կովկասը չպէտք է դառնայ ազդեցութեան դաշտ արտատարածաշրջանային տէրութիւնների համար, քանի որ օտարերկրեայ գործիչների, մասնաւորապէս՝ Միացեալ Նահանգների ներկայութիւնը վտանգում է տարածաշրջանի անվտանգութիւնը: Հայկական ընդդիմութիւնը նաեւ զգուշացրեց, որ Վաշինգտոնը փորձում է ընդլայնել իր ազդեցութիւնը Հայաստանի հարաւային սահմանների վրայ՝ մասնակցելով «Թրամփի երթուղի» անունով յայտնի տարանցիկ եւ անվտանգութեան նախագծերին, քայլ, որը կարող է խախտել տարածաշրջանի աշխարհաքաղաքական հաւասարակշռութիւնը:

Ըստ Tasnim լրատւական գործակալութեան՝ Նիկոլ Փաշինեանի կառավարութեան ընդդիմադիր շարժումները կարծում են, որ ներկայիս կառավարութեան արեւմտամէտ քաղաքականութիւնը ոչ միայն չի կարողացել լուծել Հայաստանի տնտեսական խնդիրները, այլեւ օտարացրել է երկիրը իր աւանդական գործընկերներից: Ընդդիմութիւնը նաեւ ընդգծում է, որ Սիւնիքի մարզը, Իրանի հետ ընդհանուր սահմանի շնորհիւ, ունի Իրանի, Ռուսաստանի եւ Եւրասիական տնտեսական միութեան միջեւ հիմնական տարանցիկ ուղու դառնալու ներուժ, եւ որ Երեւանի կառավարութիւնը դեռեւս պատշաճ կերպով չի օգտագործել այս ռազմավարական դիրքը:

Շարունակելով այս դիրքորոշումները՝ «Ուժեղ Հայաստան» կուսակցութեան առաջնորդները յայտարարեցին, որ էներգետիկ գծերի զարգացումը, ապրանքների տարանցումը եւ Իրանի հետ տնտեսական համագործակցութիւնը կարող են յանգեցնել Հայաստանի տնտեսական բարգաւաճմանը, սակայն ամերիկեան միջամտութիւնը եւ Կովկասի աշխարհաքաղաքական երթուղիներում ազդեցութիւնը ամրապնդելու ջանքերը լրջօրէն կը սպառնան այդ հնարաւորութիւններին։

Tasnim