Վեհափառ Հայրապետի Ամանորեայ ուղերձը՝ Հանրային հեռուստաընկերութեան եթերով չհեռարձակելու վերաբերեալ յայտարարութիւն

Լրագրողական կազմակերպութիւնների համատեղ յայտարարութեամբ են հանդէս եկել Վեհափառ Հայրապետի Ամանորեայ ուղերձը Հանրային հեռուստաընկերութեան եթերով չհեռարձակելու կապակցութեամբ։ Դրանում ասւում է.

Դեկտեմբերի 31-ին Հանրային հեռուստաընկերութեան «Առաջին ալիք»-ի նախաամանորեայ եթերով, հակառակ ձեւաւորւած աւանդոյթի, չհեռարձակւեց Վեհափառ Հայրապետի ուղերձը։ Այս փաստը տօնական օրերին հասարակութեան լայն շրջանակների քննարկման թեմա դարձաւ։ Այն մօտեցումը, որը Հանրային հեռուստաընկերութիւնը նախատեսել էր կիրառել, այն է՝ Ն.Ս.Օ.Տ.Տ. Ամենայն Հայոց կաթողիկոս Գարեգին Բ-ի ուղերձը հեռարձակել եթերի ամենադիտւող հատւածներից մէկում՝ պաշտօնական ուղերձների համար առանձնացւած ժամին, եւ ըստ այդմ կաթողիկոսի ելոյթը պէտք է յաջորդէր Սահմանադրութեամբ պետութեան գլուխ հանդիսացող ՀՀ նախագահի ելոյթին, դժւար է արդարացւած եւ հիմնաւորւած համարել։ Ինչպէս աւելի ուշ յայտնի դարձաւ, Մայր Աթոռն իր անհամաձայնութիւնն է յայտնել այդ ձեւաչափի առնչութեամբ։

Մենք՝ ներքոստորագրեալ լրագրողական կազմակերպութիւններս, կարծում ենք, որ աւանդոյթները, որոնք գրեթէ պետական արարողակարգի բնոյթ են ստացել, պէտք է փոփոխութեան ենթարկւեն միայն հանրային կարծիքի ուսումնասիրութեան եւ հնարաւոր հետեւանքների վերլուծութեան արդիւնքում։ Ի գիտութիւն ընդունելով Հանրային հեռարձակողի խորհրդի դիրքորոշումն առ այն, որ Ամանորեայ ուղերձների հեռարձակման վերաբերեալ Հայաստանում չկայ օրէնսդրական կարգաւորում, եւ հէնց դա է պատճառը, որ իւրաքանչիւր հեռուստաընկերութիւն ինքն է որոշում, թէ երբ եւ ինչ հերթականութեամբ հեռարձակի դրանք, այնուամենայնիւ պնդում ենք, որ, նախ, տւեալ պարագայում հանրային հեռարձակողին տեղին չէ նոյնացնել «իւրաքանչիւր հեռուստաընկերութեան» հետ, եւ, բացի այդ, ներկայացւած փաստարկն ընդունելի կը լինէր, եթէ խորհուրդը նախապէս հանդէս գար նման նախաձեռնութեամբ կամ յայտարարէր դրա մասին, թեման դարձնէր բազմակողմանի քննարկման առարկայ՝ այդ ընթացքում պահպանելով արմատաւորւած պրակտիկան։

Կաթողիկոսի ուղերձը աւանդական ձեւաչափով չհեռարձակելու կողմնակիցների այն հիմնաւորումը, որ Հայրապետը եւ եկեղեցին այսօր չեն վայելում հասարակութեան յարգանքը, առիթ է ստեղծում ի պատասխան խօսել վարչապետի վարկանիշի, Հանրային հեռարձակողի նկատմամբ վստահութեան եւ Հայաստանի անկախութիւնից ի վեր ձեւաւորւած աւանդոյթը վերացնելու իրաւունքի մասին։ Անհրաժեշտ է հասկանալ, որ կառավարութեան եւ Հայ Առաքելական Եկեղեցու միջեւ ծագող նման հակասութիւնները, դրանցում առկայ անցանկալի քաղաքական երանգները չեն կարող նպաստել հանրային կեանքի առողջացմանը, այլ հակառակը՝ սնում են հասարակութեան տարբեր շրջանակների միջեւ ձեւաւորւած բեւեռացումը։

Ի գիտութիւն ենք ընդունում նաեւ, որ Հանրային հեռարձակողի խորհրդին ենթակայ «Շողակաթ» հեռուստաալիքի եւ Հանրային ռադիոյի եթերում հնչել է կաթողիկոսի ուղերձը, սակայն այդ փաստը չի լուծում առաջացած խնդիրը, որը պէտք է դառնայ հետագայ քննարկումների եւ ողջամիտ որոշումների առիթ։

Ելնելով վերոգրեալից՝ Հանրային հեռարձակողի խորհրդին կոչ ենք անում.

– առաւել շրջահայեացութիւն դրսեւորել գործունէութեան այն աւանդոյթների նկատմամբ, որոնք ծայրայեղ զգայուն են հասարակութեան համար, եւ դրանք փոփոխելիս հիմնւել վստահելի ուսումնասիրութիւնների եւ վերլուծութիւնների վրայ,

– նախաձեռնել հանրային եւ մասնագիտական քննարկումներ Հանրայինի եթերում Ամանորի ուղերձները հեռարձակելու համար օրէնսդրական փոփոխութիւններ կատարելու նպատակայարմարութեան վերաբերեալ։

ԽՕՍՔԻ ԱԶԱՏՈՒԹԵԱՆ ՊԱՇՏՊԱՆՈՒԹԵԱՆ ԿՈՄԻՏԷ

ԵՐԵՒԱՆԻ ՄԱՄՈՒԼԻ ԱԿՈՒՄԲ

ՄԵԴԻԱ ՆԱԽԱՁԵՌՆՈՒԹԻՒՆՆԵՐԻ ԿԵՆՏՐՈՆ

ԻՆՖՈՐՄԱՑԻԱՅԻ ԱԶԱՏՈՒԹԵԱՆ ԿԵՆՏՐՈՆ

ԲԱԶՄԱԿՈՂՄԱՆԻ ՏԵՂԵԿԱՏՒՈՒԹԵԱՆ ԻՆՍՏԻՏՈՒՏ- ՀԱՅԱՍՏԱՆ

ՀԱՆՐԱՅԻՆ ԼՐԱԳՐՈՒԹԵԱՆ ԱԿՈՒՄԲ

«ԼՐԱԳՐՈՂՆԵՐ ՅԱՆՈՒՆ ԱՊԱԳԱՅԻ» ՀԿ

«ԼՐԱԳՐՈՂՆԵՐ ՅԱՆՈՒՆ ՄԱՐԴՈՒ ԻՐԱՒՈՒՆՔՆԵՐԻ» ՀԿ

ԳՈՐԻՍԻ ՄԱՄՈՒԼԻ ԱԿՈՒՄԲ