Բագրատ Սրբազան. «Երբ տկարանում են այս սիւները, երբ գոյութիւն չունեն, կեանքը խառնւում է իրար»

Հատւած Հայ Առաքելական Եկեղեցու Տաւուշի թեմի առաջնորդ Բագրատ արքեպիսկոպոս Գալստանեանի քարոզից․

«…Տէրն ասում է․ «Պահպանեցէ՛ք իրաւունքը (կամ ճշմարտութիւնը) եւ կատարեցէ՛ք արդարութիւնը»։ Ճշմարտութիւնը եւ իրաւունքը պահէք եւ արդարութիւնը կատարէք։ Մարդու կեանքի ամբողջ պատմութիւնը, ամբողջ ժամանակահատւածը՝ մեր ծննդեան օրից մինչեւ մեր մեկնումի օրը, ճշմարտութեան եւ արդարութեան մասին է, այդ պայքարի մասին է։

Հասարակութիւնը կը փլուզւի եւ փլուզւում է, երբ այս երկու կարեւոր սիւները չկան՝ ճշմարտութիւնը, որը կոչւում է նաեւ իրաւունք եւ արդարութիւնը։

Երբ տկարանում են այս սիւները, երբ գոյութիւն չունեն, կեանքը խառնւում է իրար։

Եւ մեր Տէրն ասում է․ «Եթէ այս երկուսը պահէք, ձեզ կը լինի ե՛ւ բարիք, ե՛ւ ողորմածութիւն, եւ եթէ ոչ, ո՛չ ողորմածութիւնը կը լինի եւ ո՛չ էլ բարիքը»։

Մեր այսօրւայ կեանքի պատկերը՝ ճշմարտութիւնից զրկւած եւ արդարութիւնից տկարացած, հէնց դրա մասին է։

Բացակայում է՝ գաղափարական իմաստով, այդ մեծ՝ արդարութեան ձգտումը, ճշմարտութեան ձգտումը…»։

Yerkir.am