Ռուսաստանի մի շարք կազմակերպութիւնների յայտարարութիւնը
ՀՅԴ Հայ Դատի Մոսկւայի գրասենեակը, ՀՅԴ Ռուսաստանի կազմակերպութիւնը, Հայ Օգնութեան միութեան եւ «Համազգային» Համահայկական կրթական մշակութային միութեան Ռուսաստանի կազմակերպութիւնները, Հայ Մարմնակրթական Ընդհանուր միութեան Մոսկւայի մասնաճիւղը, «Դէպի Արարատ» հասարակական կազմակերպութիւնը եւ «Ապաւէն» համառուսաստանեան բարեգործական շարժումը միանում են Բագրատ Սրբազանի առաջնորդութեամբ եւ Հայ Առաքելական Սուրբ Եկեղեցու օրհնութեամբ մեկնարկած պայքարին եւ իրենց անվերապահ աջակցութիւնն են յայտնում յանուն Հայրենիքի եւ արժանապատւութեան ծաւալւող շարժմանը։
Խստիւ դատապարտում ենք ՀՀ գործող իշխանութիւնների կողմից Հայաստանի Հանրապետութեան ինքնիշխան տարածքները թշնամուն յանձնելուն ուղղւած հակաիրաւական եւ հակապետական քաղաքականութիւնն ու գործողութիւնները, որոնց հիմնական թիրախը Հայաստանի Հանրապետութեան անվտանգութեան համակարգի ջլատումն ու պետականութեան կազմաքանդումն է։
Միանալով Բագրատ Սրբազանի առաջնորդութեամբ ծաւալւած եւ յանուն Հայրենիքի մղւող պայքարին՝ սատարում ենք այս օրերին արդարացի պահանջով ընդվզած տաւուշցիներին, այդ պայքարին միացած ու միացող աշխարհասփիւռ հայութեանը, եւ կոչ ենք անում իշխանութիւններին զերծ մնալ ատելութեան խոսքի տարածումից, բռնաճնշումներից եւ ապօրինութիւններից։
Հայ ժողովուրդն իրաւունք ունի չզիջել իր կենսական տարածքներն ու անվտանգութիւնը մի ցեղասպան պետութեան, որը հայրենազրկել է աւելի քան հարիւր յիսուն հազար արցախցիների, որն այսօր էլ բանտերում խոշտանգում է տասնեակ գերիների, շարունակում է զաւթած պահել մեր ինքնիշխան տարածքները, շարունակում է ոչնչացնել մեր եկեղեցիներն ու գերեզմանները հայաթափւած Արցախում եւ չի՜ ընդունում մեր գոյութեան իրաւունքը՝ Հայաստանի Հանրապետութեան ներկայ տարածքը համարելով Արեւմտյան Ադրբեջան։
Կո՛չ ենք անում աշխարհասփիւռ հայութեանը միաբանւել եւ կասեցնել այս պետականակործան ընթացքը, քանի որ գիտակցում ենք, որ Սփիւռքի կենսունակութեան եւ հզօրութեան միակ երաշխիքն ու գրաւականը կենսունակ եւ հզօր Հայկական պետականութիւնն է՝ Հայաստանի Հանրապետութիւնը։
Հայ Դատի Մոսկւայի գրասենեակ
ՀՅԴ Ռուսաստանի Կոմիտէ
Հայ Օգնութեան միութեան Ռուսաստանի կազմակերպութիւն
«Համազգային» Համահայկական կրթական մշակութային միութեան Ռուսաստանի կազմակերպութիւն
Հայ Մարմնակրթական Ընդհանուր միութեան Մոսկւայի մասնաճիւղ
«Դէպի Արարատ» հասարակական կազմակերպութիւն
«Ապաւէն» համառուսաստանեան բարեգործական շարժում
Մոսկւա, 08 մայիսի 2024
