Լիլիթ Գալստեան. «Գազայի Ցեղասպանութիւնը փաստարկւած է, ինչպէս եւ Արցախի էթնիկ զտումն ու հայաթափումը»
«ԱԼԻՔ» – ՀՅԴ Հայաստանի ԳՄ անդամ, ՀՀ ԱԺ «Հայաստան» խմբակցութեան անդամ Լիլիթ Գալստեանը ֆէյսբուքեան իր էջում գրառում է կատարել՝ Պաղեստինի պետութեան ճանաչման, Գազայում տեղի ունեցող ցեղասպանութեան եւ Արցախեան հիմնահարցերի միջեւ.
«ՄԱԿ-ի Գլխաւոր ասամբլեայի որոշմանը միանալու եւ Պաղեստինի պետութիւնը ճանաչելու Հայաստանի քայլը աշխարհաքաղաքական մեծ ներուժ ունի։
Իհարկէ, ցանկալի կը լինէր, եթէ ԱԳՆ յայտարարութեան տեքստում «միջազգային իրաւունքի, ժողովուրդների հաւասարութեան, ինքնիշխանութեան ու խաղաղ համակեցութեան սկզբունքների» շարքում նշւէր նաեւ ԻՆՔՆՈՐՈՇՄԱՆ իրաւունքը։
Բայց ՀՀ իշխանութիւններին թոյլ տրւող «քաջութեան սահմանն» այսքանն է։
Ինչեւէ, ՄԱԿ-ի օրակարգում այս խնդրի ներառումն ու նման լուրջ բանաձեւի ընդունումը խօսում է միջազգային քաղաքական օրակարգում տեղաշարժերի, բարոյական քաղաքականութեան սկզբուննքերի արթնացման, նաեւ միջազգային կառոյցների առաքելութիւնների, միջազգային իրաւունքի ու սկզբունքների հնարաւոր վերադարձի մասին։ Պարզօրէն՝ սա նաեւ դէմք փրկելու գործողութիւն է․․․, որը լրջագոյն աշխարհաքաղաքական պոտենցիալ ունի։
Գազայի Ցեղասպանութիւնը փաստարկւած է եւ անշրջելի, ինչպէս եւ Արցախի էթնիկ զտումն ու հայաթափումը։ Բայց սա չի նշանակում, թէ Արցախի կոնֆլիկտը լուծւել է, կամ այսպէս կոչւած «խաղաղութեան» համաձայնագիրը համադարման է։
Բոլորովին հակառակը՝ Պաղեստինի նախադէպը՝ երկու պետութիւնների խաղաղ համակեցութկան մոդելը, նաեւ միջազգային դիսկուրսում բացառիկ հնարաւորութիւն է Հայաստանի համար՝ խօսելու ագրեսիայի, պատերազմի ճանապարհով խնդրի լուծման անընդունելիութիւնը, միջազգային իրաւունքի եւ սկզբունքների ոտնահարման մասին, ինչպէս նաեւ առաջ տանելու միջազգային իրաւունքով, մի շարք միջազգային կոնւենցիանորով/ Մարդու իրաւունքների հռչակագիր եւ այլն/ ամրագրւած ՎԵՐԱԴԱՐՁԻ իրաւունքը։
Պաղեստինը երկար է սպասել այս օրւան, շատ ծանր հատուցելով, բայց չի հրաժարւել պետութիւն եւ արժանապատիւ խաղաղութիւն ունենալու կամքից։
ՀՀ իշխանութիւնները մեզ ամենօրեայ ռեժիմով նւաստացնում են, պարտութիւնն իբր անխուսափելի իրողութիւն փաթաթում մեր վզին, մեր նւաստացումը դարձնելով անշրջելի, պետութեան ապագան՝ հարցականի տակ։
Սա իշխանութիւնը սեփական ձեռքում կենտրոնացած մէկ՝ մարդու արժեհամակարգ է եւ յանձնառութիւն՝ մեզ պարտադրւող դաւադիր ծրագիր։
Արցախեան խնդիրը փակւած չէ․․․ որեւէ մէկն այն փակելու, մեզ հայրենազրկելու իրաւունք չունի։ Պաղեստինցին հազար տարի է սպասել, չի յանձնւել․․․
Արտաքին քաղաքական նոր դիսկուրսի պայմաններում ՀՆԱՐԱՒՈՐ է, բայց ՈՉ ԱՅՍ ԻՇԽԱՆՈՒԹԵԱՆ ԴԷՄՔՈՎ ԵՒ ՀԱՄՈԶՈՒՄՆԵՐՈՎ։
Խնդիրը մեր մէջ է՝ չյանձնւել, Յանուն Հայաստանի բեկել այս իրականութիւնը»,- գրել է նա:
