Արման Թաթոյեան. «Մեր հերոսների, անմեղ զոհերի ճակատագրի պատմութիւնը՝ ազգային ու պետական արժէքներով դաստիարակութեան ապացոյց»
«ԱԼԻՔ» – Նախօրէին ՀՀ Մարդու իրաւունքների նախկին պաշտպան Արման Թաթոյեանը ֆէյսբուքեան իր էջում գրառում է կատարել՝ անդրադառնալով 2020 թւականի 44-օրեայ պատերազմի 4-րդ տարելիցին:
«Արցախի ու Հայաստանի նկատմամբ Ադրբեջանի (թուրքական աջակցութեամբ) 4 տարի առաջ սանձազերծած աղէտալի պատերազմն արմատապէս փոխեց մեր կեանքը:
Հիմա մեր սրտերը ծանրացած են մեր հերոսների, անմեղ զոհերի մասին յիշողութիւններով, ովքեր Հայրենիքի համար պայքարել են իրենց կեանքով, սխրանքներով ապահովել են մեզ համար գոյութիւն եւ պաշտպանել պետութիւնը։
Նրանցից իւրաքանչիւրի ճակատագրի պատմութիւնը զօրեղ ոգու ու հայրենասիրութեան վկայութիւն է, ազգային ու պետական արժէքներով դաստիարակութեան ապացոյց։
Պատերազմի հետեւանքները կրում ենք նաեւ այսօր՝ ադրբեջանական զինւած յարձակումների հետեւանքով բռնի տեղահանւած, բռնի անհետացած ու գերեվարւած մեր հայրենակիցների ճակատագրեր, ինչպէս նաեւ Ադրբեջանի կողմից Հայաստանի տարածքների ու Արցախի զաւթումով, մարդկանց պատճառած տառապանքներով։
Պատերազմի այդ աղէտալի հետեւանքները, ցաւօք, մեզ վրայ կրելու հաշւին հասկացանք, որ երբեք չպէտք է պետական պաշտօն զբաղեցնեն մարդիկ, ովքեր իրենց անձնական շահերն ու պաշտօնը բարձր են դասում պետութիւնից, պատրաստ են պետութիւնը թուլացնող քայլերի` միայն թէ կարողնանան կոծկել իրենց անձնական սխալները:
Սա պետականութեան համար անգամ առաւել վտանգաւոր է, քան այն կործանելու մոլուցքով ապրող թշնամին։
Պէտք է վառ պահել վեր յառնելու հաւատը, պէտք է առաջ տանել արդարութեամբ խաղաղութեան հասնելու, զօրեղ պետութիւն ունենալու, աշխարհի հայութեան համերաշխութեան մեր յանձնառութիւնը»,- գրել է նա:
