Կարեւորւել է Արցախի պետականութեան շուրջ համախմբումը
«ԱԼԻՔ» – Դեկտեմբերի 11-ին ՀՅԴ Արցախի Կենտրոնական կոմիտէի եւ ԱՀ Ազգային Ժողովի «Դաշնակցութիւն» խմբակցութեան անդամները հանդիպել են Արցախի թեմի առաջնորդ Տէր Վրթանէս եպիսկոպոս Աբրահամեանի հետ։ Ներկայ է եղել նաեւ Արցախի թեմի հոգեւոր-մշակութային ժառանգութեան հարցերով գրասենեակի ղեկավար Մ․Բալայեանը։ Տեղեկացնում է «Ապառաժը»-ը:
Հանդիպմանը կարեւորւել է Արցախի պետականութեան պահպանման անհրաժեշտութիւնը եւ այդ ուղղութեամբ անելիքները։ Սրբազանը խօսել է Արցախի թեմի հոգեւոր-մշակութային ժառանգութեան հարցերով գրասենեակի ծրագրերի, արցախցիների հետ հանդիպումների եւ նրանց հիմնախնդիրների շուրջ, կարեւորել՝ ՀՅԴ կուսակցութեան հետ համագործակցութիւնը։
ՀՅԴ Արցախի ԿԿ-ն ողջունել է Արցախի թեմի նախաձեռնութիւնները, կարեւորել թեմի՝ Արցախի հոգեւոր եւ մշակութային արժէքների պահպանմանն ուղղւած աշխատանքները։
ՀՅԴ Արցախի ԿԿ-ն իր մտահոգութիւնն է յայտնել Ադրբեջանի կողմից Արցախի մշակութային եւ հոգեւոր արժէքների խեղաթիւրման, Առաքելական եկեղեցիների դէմ ծաւալւող քարոզչական եւ դիւանագիտական պայքարի, այն՝ այլ համայնքների սեփականութիւնը դարձնելու փորձերի առնչութեամբ եւ կարեւորել Արցախի թեմի դերակատարութիւնը՝ այդ գործընթացի կանխարգելման ուղղութեամբ։
Սրբազանը անհրաժեշտութիւն է համարել միասնականութիւնը՝ Արցախի պետականութեան շուրջ, ինչպէս նաեւ կարեւորել համախմբումը՝ առկայ մարտահրաւէրներին դիմակայելու ու արցախցիների հաւաքական վերադարձի իրաւունքի իրացման շուրջ։
