Արման Թաթոյեան. «Դա ի՞նչ քրէական վարոյթի կամ հետապնդման ենթակայ արարք է, կամ այդ միայն Աւետի՞քն էր նման արտայայտութիւն արել»

Արման Թաթոյեանը գրում է. «Իրաւապաշտպան Աւետիք Իշխանեանի նկատմամբ «Ֆէյսբուք»-ում գրառում անելու փաստի առթիւ քրէական վարոյթ նախաձեռնելն ուղղակի ամօթալի, էժան արարք է: Դա ի՞նչ քրէական վարոյթի կամ հետապնդման ենթակայ արարք է, կամ այդ միայն Աւետի՞քն էր նման արտայայտութիւն արել:

Նախ՝ Աւետիք Իշխանեանի նկատմամբ, ըստ պաշտօնական պարզաբանման, քրէական հետապնդում յարուցւած չէ, ոչինչ չի փոխում: Նախաձեռնւած քրէական վարոյթն անխզելիօրէն կապւած է պարոն Իշխանեանի հետ. նրա՝ դեռեւս սեպտեմբերի 19-ին արւած գրառումն է դարձել քրէական ընթացակարգ սկսելու հիմք:

Այս վիճակն առաւել խնդրայարոյց է: Ստացւում է՝ գործ ունենք փաստացի քրէական հետապնդման հետ, երբ իրաւապահ մարմնին յայտնի է անձը, ում նկատմամբ ցանկանում է իրականացնել հետապնդում, բայց նրան իրաւական կարգավիճակ եւ իրաւունքներից լիարժէք ծաւալով օգտւելու հնարաւորութիւն չտալու համար նախաձեռնւում է «անմեղ» քրէական վարոյթ, իսկ իրականում տարւում է փաստացի հետապնդում՝ առանց իրաւունքների:

Միւսը՝ մի հատ հաշւէք տեսնեմ օրական քանի հոգի է նմանատիպ կամ նոյն արտայայտութիւնն անում սոցիալական ցանցերում, առաւել եւս այլ միջավայրերում: Յարուցւելո՞ւ են քրէական հետապնդնդումներ, թէ՞ էլի խտրական է լինելու ու Քրէական օրէնսգրքի այս յօդւածը գործելու է միայն իշխանութեանը քննադատողների նկատմամբ:

Քրէական օրէնսգրքի այս յօդւածը Հայաստանում կիրառութիւն ստացող արատաւոր պրակտիկայի հետ միասին բացայայտ հակասահմանադրական է եւ էլի դառնում է պաշտօնեաների պահապան յօդւած:

Աւետիք Իշխանեանն իր ողջ կեանքը նւիրել է մարդու իրաւունքների պաշտպանութեանը: Մեղադրեալի կարգավիճակն եւ պարոն Իշխանեանը նոյնքան անհամատեղելի են, որքան իրաւունքի գերակայութիւնն ու յանուն պաշտօնի գոյատեւող մարդը»։