Չի կարելի թոյլ տալ, որ Meta-ն եւ Ցուկերբերգը ձեւաւորեն մարդկութեան յաջորդ դարաշրջանը

«Երբ 20 տարի առաջ Facebook-ն առաջին անգամ գործարկւեց որպէս կոլէջների սոցիալական ցանց, քիչ նշաններ կային, որ այն կը դառնայ այն, ինչ կայ այսօր: Ընկերութիւնը, որն այժմ վերանւանւել է Meta, վերահսկում է մեր տեղեկատւական եւ հաղորդակցական համակարգերի կարեւոր ենթակառուցւածքն ու հասանելիութիւնը հանրային դաշտ եւ կենտրոնական տեղ է զբաղեցնում թւային տնտեսութեան մէջ:

Ո՞վ կը կանխատեսէր, որ ընկերութիւնը, որը հիմնադրւել է որպէս կոլէջի ուսանողների համախմբման միջոց, կը մեղադրւի ամբողջ աշխարհում հոգեկան առողջութեան վատթարացման, ցեղասպանական բռնութեան եւ հակադեմոկրատական ​​պոպուլիզմի աճի մէջ: Եւ այնուամենայնիւ, մենք հասել ենք դրան»,- The Guardian պարբերականի համար գրել է Բաց շուկաների ինստիտուտի Լրագրութեան եւ ազատութեան կենտրոնի տնօրէն Քորթնի Ռադշը:

Ըստ յօդւածագրի՝ վերջին տասնամեակում ընկերութեան սոցիալական ցանցերն ու հաղորդագրութիւնների փոխանակման ալիքները կապւած են եղել ինքնագնահատականի եւ հոգեկան առողջութեան վատթարացման հետ, ներառեալ տագնապի, դեպրեսիայի եւ կախւածութեան աճը:

«Meta-ի հիմնական արտադրանքները՝ Facebook-ը, Messenger-ը, Instagram-ը եւ WhatsApp-ը, նպաստում են մարդկանց թրաֆիքինգին, թմրամիջոցների եւ վայրի կենդանիների ապօրինի առեւտրին, ինչպէս նաեւ երեխաների սեռական բռնութեան եւ շահագործման մասին նիւթերի տարածմանը: Մարդիկ օգտագործում են սոցիալական լրատւամիջոցները եւ Meta հաղորդագրութիւնների հարթակները՝ քարոզչութիւն, ապատեղեկատւութիւն եւ տեղեկատւական պատերազմ վարելու համար՝ խաթարելով մեր տեղեկատւական էկոհամակարգերի ամբողջականութիւնը եւ ընտրութիւններն ամբողջ աշխարհում»,- շեշտել է Ռադշը:

Մօտ 4 միլիարդ մարդ կանոնաւոր կերպով օգտւում է Meta-ի հիմնական արտադրանքներից՝ տեխնոլոգիական հսկան դարձնելով ամենահզօր ընկերութիւններից մէկը մի շարք ոլորտներում՝ տւեալների հաւաքումից եւ վերլուծութիւնից մինչեւ թւային գովազդ եւ հրատարակչութիւն: Meta-ն վերահսկում է ինտերնետ հասանելիութիւնը շատ երկրներում եւ որոշում է բովանդակութիւն ստեղծողների, ձեռնարկութիւնների եւ քաղաքական գործիչների կենսունակութիւնն ու շահութաբերութիւնն ամբողջ աշխարհում, գրում է յօդւածի հեղինակը։

«Եթէ վերջին 20 տարիները մեզ ինչ-որ բան են սովորեցրել տեխնոլոգիական տիտան դարձած այս նախկին դուրսպրծուկի մասին, ապա դա այն է, որ մենք չենք կարող թոյլ տալ, որ Meta-ն եւ Ցուկերբերգը միակողմանի ձեւաւորեն մարդկութեան յաջորդ դարաշրջանը: Քանի որ տեխնոլոգիաների աշխարհը տանում է այս փուլանիշը, ժամանակն է պատասխանատւութիւն պահանջել Meta-ի նման հզօր տեխնոլոգիական ընկերութիւնների կողմից հասցւած վնասների համար եւ ոչնչացնել տեխնոլոգիական հսկային՝ նախքան այն հետագայ վնաս կը հասցնի առանձին մարդկանց, հասարակութեանը եւ տնտեսութեանը: Meta-ի թւային ժառանգութեան ապամոնտաժումն անհրաժեշտ է, եթէ մենք ցանկանում ենք վերականգնել վերահսկողութիւնը եւ փրկել ժողովրդավարութիւնը»,- եզրակացրել է յօդւածագիրը։

News.am