Քանանի. «Ազգային անվտանգութիւնը, սահմանների անվտանգութիւնը եւ Իրանի քաղաքացիների անվտանգութիւնը կարմիր գիծ են»
Parstoday.ir-ի համաձայն՝ Իրանի Իսլամական Հանրապետութեան արտաքին գործերի նախարարութեան խօսնակն ասել է. «Ազգային անվտանգութիւնը, սահմանային անվտանգութիւնը եւ Իրանի քաղաքացիների անվտանգութիւնը կարմիր գիծ են, եւ Իրանի Իսլամական Հանրապետութեան կառավարութիւնն ու Զինւած ուժերը անտարբեր չեն լինի ապահովելու եւ պաշտպանելու իրենց քաղաքացիների անվտանգութիւնը, եւ միշտ էլ այդպէս են եղել»։
Երկուշաբթի օրը լրագրողների հետ ամենշաբաթեայ հանդիպմանը, անդրադառնալով Իրաքի Էրբիլում գտնւող «Մուսադ»-ի կենտրոնակայանի վրայ Իրանի հրթիռային յարձակմանը, Նասեր Քանանին ասել է. ««Մուսադ» ահաբեկչական կազմակերպութեան կենտրոնակայանի դէմ Իրանի գործողութեան նպատակն էր պատժել Իրանի անվտանգութեանն սպառնացողներին, այլ ոչ թէ յարձակում գործել Իրաքի տարածքային ինքնիշխանութեան վրայ»։
Քանանին ասել է. «Իրանն Իրաքի անվտանգութեան, ինքնիշխանութեան եւ տարածքային ամբողջականութեան ամենամեծ պաշտպանն է եւ այս երկրի միասնութեան ու տարածքային ամբողջականութեան ջատագովը»։
Իրան-Պակիստան յարաբերութիւններում վերջին շրջանում տիրող լարւածութեան վերաբերեալ Քանանին յաւելել է. «Իրանի եւ Պակիստանի յարաբերութիւնները ամուր յարաբերութիւններ են. Իրանի Զինւած ուժերի դէմ բազմաթիւ յանցաւոր անցեալ ունեցող ահաբեկչական խմբաւորման դէմ գործողութիւնը եղել է Իրանի քաղաքացիների անվտանգութեան պաշտպանութեան շրջանակներում»։
Քանանին նաեւ աջակցեց Հարաւաֆրիկեան Հանրապետութեան կառավարութեան խիզախ եւ մարդասիրական գործողութիւններին՝ Արդարադատութեան միջազգային դատարանում սիոնիստական ռեժիմի դէմ հայց ներկայացնելու կապակցութեամբ եւ ասաց. «Ցաւօք, անցած հարիւր ութ օրերի ընթացքում սիոնիստական ռեժիմը միջազգայնօրէն ճանաչւած չորս յանցագործութիւն է կատարել՝ ներառեալ ցեղասպանութիւն, մարդկութեան դէմ յանցագործութիւններ, ռազմական յանցագործութիւններ եւ ագրեսիա Պաղեստինի ժողովրդի դէմ»:
