ԵՄ դիւանագիտութեան ղեկավար Ժոզէֆ Բորէլը Իրանին կոչ է արել պահպանել զսպւածութիւնը
ԱԳ Նախարար Հոսէյն Ամիր Աբդօլլահեանն ԵՄ դիւանագիտութեան ղեկավար Ժոզէֆ Բորէլի հետ հեռախօսազրոյցում կարեւորել է ՄԱԿ-ի գլխաւոր քարտուղար Անտոնիօ Գուտերէշի կողմից Իրանի Իսլամական Հանրապետութեան դեսպանատան վրայ յարձակման դատապարտումը եւ անդրադարձել է Եւրոմիութեան արտաքին եւ անվտանգութեան քաղաքականութեան հարցերով գերագոյն ներկայացուցուցչի կոչին՝ պահպանելու Իրանի զսպւածութիւնը, հաղորդում է ԻՌՆԱ-ն:
Դամասկոսում Սիոնիստական ռեժիմի կողմից իրականացւած ահաբեկչութեանը եւ Իրանի Իսլամական Հանրապետութեան դեսպանատան հիւպատոսական բաժնի վրայ յարձակմանն անդրադառնալով, որը յանգեցրել է մեր երկրի ռազմական խորհրդականներից թւով 7-ի նահատակութեանը, ԱԳ Նախարարը ցաւով է արձանագրել Սիրիայի որոշ քաղաքացիների վիրաւորումը եւ նկատել է, որ եւրոպական իշխանութիւնները մշտապէս Իրանի Իսլամական Հանրապետութեանը զսպւածութեան կոչ են յղում, սա այն դէպքում, երբ Իսրայէլի ռեժիմը, խախտելով միջազգային օրէնքներն ու կանոնները, յարձակւել է դիւանագիտական օբիեկտի ուղղութեամբ, որը լիակատար անձեռնմխելիութիւն պէտք է վայելէր հիմնւած Դիւանագիտական եւ հիւպատոսական իրաւունքների մասին կոնւենցիայի վրայ։
Մեր երկրի արտաքին գործերի նախարարն ընդգծել է, որ ահաբեկչութեան դէմ պայքարում դիւանագիտական առաքելութիւն եւ ռազմական խորհրդականի պաշտօն ունեցող Իրանի 7 քաղաքացիներ եւ Սիրիայի վեց քաղաքացիներ, այդ թւում՝ կանայք եւ երեխաներ զոհւել են, խախտւել է տարածաշրջանային խաղաղութիւնն ու անվտանգութիւնը, զոհւել են դիւանագէտներ, իսկ դիւանագիտական վայրերի անվտանգութիւնն ամբողջութեամբ խախտւել է, Իսրայէլի ռեժիմի կողմից այս ահաբեկչութեան իրականացման հետեւանքով:
«Ցաւօք, Գազայում շարունակում են Իսրայէլի ռեժիմի ցեղասպանութիւնն ու պատերազմական յանցագործութիւնները, ԱՄՆ-ի շարունակական աջակցութեամբ, եւ, բնականաբար, եթէ Միացեալ Նահանգները լուրջ կամք չդրսեւորի վերահսկելու եւ դադարեցնելու իրավիճակը, տարածաշրջանի լարւածութեան սրման ուղղակի պատասխանատուն լինելու է այդ երկիրը»,- նշել է նա:
