Իրանը ցաւակցութիւն է յայտնել Տաւուշի եւ Լոռու մարզերում հեղեղումների հետեւանքով մարդկային զոհերի կապակցութեամբ
«ԱԼԻՔ» – ԱԳ նախարարի ժամանակաւոր պաշտօնակատար Ալի Բաղերի Քանին հեռախօսազրոյց է ունեցել ՀՀ ԱԳ նախարար Արարատ Միրզոյեանի հետ: Այս մասին տեղեկանում ենք ՀՀ ԱԳՆ-ից:
Բաղերի Քանին ցաւակցութիւն եւ զօրակցութիւն է յայտնել ՀՀ Տաւուշի եւ Լոռու մարզերում հեղեղումների հետեւանքով մարդկային զոհերի եւ վնասների կապակցութեամբ:
Իր հերթին Արարատ Միրզոյեանն էլ կրկին ցաւակցել է հանգուցեալ նախագահ Ռէյիսիի, ԱԳ նախարար Ամիր Աբդօլլահեանի եւ նրանց ուղեկցող անձանց զոհւելու կապակցութեամբ, եւ արտայայտել է իր զօրակցութիւնը:
Հեռախօսազրոյցի ընթացքում զրուցակիցներն ընդգծել են, որ երկու երկրների եւ ժողովուրդների միջեւ բարիդրացիական կապերը խորն են ու ամուր եւ կը կրեն շարունակական բնոյթ: Նրանք անդրադարձ են կատարել երկկողմ եւ տարածաշրջանային օրակարգին՝ շեշտելով մինչ այս ձեռք բերւած պայմանաւորւածութիւնների իրականացման եւ ընթացիկ ծրագրերի շարունակականութեան ապահովման հարցում փոխադարձ պատրաստակամութիւնը:
