Գազան՝ Իսլամական Յեղափոխութեան առաջնորդի եւ Իրաքի վարչապետի հանդիպման առանցքային թեման
«ԱԼԻՔ» – Իսլամական Յեղափոխութեան առաջնորդ այաթ. Սէյէդ Ալի Խամենէին նոյեմբերի 6-ին, Իրաքի վարչապետ Մոհամմադ Շիա Ալսուդանիի եւ նրան ընկերակցող պատւիրակութեան հետ հանդիպման ժամանակ, բարձր է գնահատել Իրաքի կառավարութեան ու ժողովրդի կառուցողական դիրքորոշումը՝ Գազայի ժողովրդին զօրակցելու առումով եւ կարեւորել է Իսլամական աշխարհի կողմից քաղաքական առաւել ճնշումների գործադրումն ԱՄՆ-ի ու սիոնիստական ռեժիմի նկատմամբ՝ Գազայի ժողովրդի կոտորածը դադարեցնելու նպատակով: Յեղափոխութեան առաջնորդի գրասենեակի տեղեկատւական կայքէջի համաձայն, այաթ. Խամենէին ընդգծել է. «Իրաքը տարածաշրջանում կարեւոր երկիր է եւ կարող է յատուկ դերակատարութիւն ունենալ այդ ուղղութեամբ եւ նոր ուղղութիւն ճշտել իսլամական ու արաբական աշխարհում»։
Յեղափոխութեան առաջնորդն անդրադարձել է Գազայում տիրող ծանր իրավիճակին, որը խոցել է բոլոր ազատատենչ ժողովուրդների սրտերը, եւ նշել է․«Սիոնիստական ռեժիմի յարձակումների առաջին իսկ օրերից, բոլոր ապացոյցները վկայում են պատերազմի ղեկավարման հարցով ամերիկացիների ուղղակի միջամտութիւնը եւ ինչքան անցնում է պատերազմից, աւելի բացայայտ է դառնում այս պատերազմում այդ երկրի անմիջական դերակատարութեան հանգամանքները»։
Այաթ. Խամենէին յստակեցրել է. «Եթէ ԱՄՆ-ը քաղաքական ու սպառազինական աջակցութիւններ չյատկացնի, սիոնիստական ռեժիմին, այն անկարող է շարունակել պատերազմը» եւ յաւելել է. «Աներկբայօրէն կարելի է ասել, որ ԱՄՆ-ը Գազայի ոճրագործութիւններում սիոնիստների մեղսակիցն է»:
Յեղափոխութեան առաջնորդի հաւաստմամբ. «Չնայած Գազայում կատարւող բոլոր սպանութիւններին, սիոնիստական ռեժիմը մինչ այժմ այս խնդրի իրական պարտւողն է, քանի որ չի կարողացել վերականգնել իր կորցրած պատիւն եւ չի կարող դա կատարել ապագայում եւս»:
