Նախագահ Ռէյիսի. «Իրանի ժողովուրդը վճռակամօրէն կը պայքարի ահաբեկչութիւնն արմատախիլ անելու համար»
«ԱԼԻՔ» – Ցաւակցելով Քերմանի ահաբեկչական ոճրագործութեան ժամանակ մի խումբ հայրենակիցների նահատակութեան կապակցութեամբ՝ Հանրապետութեան նախագահը պատկան մարմիններին յանձնարարել է հնարաւորինս արագ ձեռնարկել անհրաժեշտ միջոցները՝ տուժածների ցաւը թեթեւացնելու, վիրաւորներին բուժելու եւ Քերման քաղաքում անվտանգութիւնը վերականգնելու համար։
Այաթ. Սէյէդ Էբրահիմ Ռէյիսին իր ուղերձում խստօրէն դատապարտելով Քերմանի գերեզմանատանը տեղի ունեցած ահաբեկչական յարձակումը, այն որակել է որպէս հակաիրանական յանցագործութիւն եւ պատկան մարմիններին ու պատասխանատուներին յանձնարարել է անյապաղ քայլեր ձեռնարկել յանցագործութեան հեղինակներին յայտնաբերելու եւ պատժելու ուղղութեամբ։
«Ազգի թշնամիները պէտք է իմանան, որ նման գործողութիւնները երբեք չեն կարող խաթարել Իրանի ժողովրդի երկաթեայ վճռականութիւնը՝ պաշտպանելու իսլամական իդէալները, եւ նրանք աւելի վճռակամօրէն կը պայքարեն բռնութիւնը եւ ահաբեկչութիւնն արմատախիլ անելու համար»,- ասել է նախագահը։
