Ս. Ստեփանոսի տօնին, նշւեց Ուրմիայի եկեղեցու անւանակոչութեան տօնը
Ատրպատական, ազգային առաջնորդարան, Թաւրիզ – Կիրակի, դեկտեմբերի 22-ին, Ս. Ստեփանոս Նախավկայի տօնի եւ Ուրմիայի նոյնանուն եկեղեցու անւանակոչութեան առիթով, առաւօտեան ժամը 11:00-ին, եպիսկոպոսական հանդիսաւոր Սուրբ եւ Անմահ Պատարագ մատուցւեց ուրմիահայութեան հոգեւոր տան՝ Ս. Ստեփանոս ծխական եկեղեցում:
Հանդիսաւոր Սուրբ Պատարագը մատուցեց եւ իր պատգամը յղեց Ատրպատականի հայոց թեմի առաջնորդ Տ. Գրիգոր արք. Չիֆթճեանը: Սուրբ խորանին սպասարկում էին Տ. Մարտիրոս քհնյ. Ղուկասեանը, Բարեշնորհ Սեւան սրկ. Ենովքեանը եւ մոմակիր՝ փոքրիկ դպիրներ: Սուրբ Պատարագի երգեցողութիւնը կատարեց եկեղեցու «Նարեկացի» երգչախումբը, իսկ Ճաշու գիրքը ընթեցեց Անահիտ Ամիրեանը:
Սուրբ Պատարագին ներկայ գտնւեցին Ազգային իշխանութեան անդամները, եկեղեցու վերաշինութեան եւ ուրմիահայութեան ազգային նւիրեալ բարերար՝ Էդիկ եւ Սանդրա Մեջլումեանները, Պատգամաւորական ժողովի եւ Գործակալական խորհրդի անդամները, միութիւնների եւ կազմակերպութիւնների վարչութիւնները եւ անդամները եւ ուրմիահայ հաւատացեալներ:
Առաջնորդ Սրբազան Հայրը իր քարոզում ներկայացրեց օրւայ տօնի խորհուրդը, անդրադարձաւ Սուրբ Ստեփանոս Նախավկայի կեանքին ու նահատակութեան, յիշելով որ նա էր քրիստոնէութեան առաջին վկան: «Ս. Ստեփանոսը իր արութեամբ, բոլոր ժամանակների քրիստոնեայ հաւատացեալների համար շարունակում է մնալ ներշնչման հսկայ աղբիւր»,- ասաց նա:
Սրբազան Հայրը կարեւորութեամբ ընդգծեց նահատակութեան գաղափարը, որը միայն արիւնահեղութեամբ չի՛ աւարտւում: «Կեանքի ընթացքում, յատկապէս զոհողութեան գաղափարով շարունակւող օրեր, ամիսներ ու տարիներ կարող է ունենալ նահատակութիւնը, որը նւիրեալ անձեր իրենց ուսերին են վերցնում, ծառայութեան ոգով: Ս. Ստեփանոսը այն անձն էր, որ իր սեփական կեանքի բոլոր հաճոյքներից հրաժարւեց, նւիրւելով քրիստոնէական կրօնի վկայութեան մեծ գործին»,- շեշտեց Սրբազան Հայրը:
Քարոզի ընթացքում, Սրբազան Հայրը անդրադարձաւ ուրմիահայութեան հեռաւոր ու մօտաւոր անցեալի պատմութեան: Նա յիշեց, որ շրջակայ աւելի քան տասնեակ գիւղերը հետզհետէ դատարկւել էին տարիների ընթացքում, եւ Ուրմիա քաղաքը սկսւել էր լցւել հայերով: Նրանցից շատերի գիւղական կեանքը անապահով վիճակի էր մատնւել, եւ գիւղատէրերի քմահաճոյքին էին ենթարկւում գիւղացիներից շատերը: «1890 թ.-ին, երբ միայն 45 տուն հայ բնակչութիւն ունէր Ուրմիա քաղաք, տեղի հայերը, որոնք մեծ մասամբ վաճառականներ էին, ուզեցին ունենալ իրենց սեփական եկեղեցին, որի հիմքը դրեցին նոյն տարում: Յաջորդ տարի, երբ աւարւտել էր հողաշէն եւ փատածածկ շինութիւնը սրահանման եկեղեցու, տեղի հայերը Դերիկի վանքից Ուրմիա հրաւիրեցին Ս. Աստւածածին վանքի ֆեդայի վանահայր Բագրատ վրդ. Թաւաքալեանին, որը իր սուրբ աջով օծումը կատարեց Ս. Ստեփանոս եկեղեցու: 2001 թ.-ին, երբ արդէն 111 տարի էր եղել եկեղեցու կառուցմանը, եւ փլուզման վտանգի առջեւ էր կանգնած այն, օրւայ Առաջնորդի եւ Ազգային իշխանութեան առաջարկին ընդառաջելով, Էդիկ եւ Սանդրա Մեջլումեանները իշխանական նւիրատւութեամբ այս հրաշագեղ եկեղեցին կառուցին, նւիրաբերելով այն ուրմիահայութեան: Այսօր մէկ անգամ եւս մեր թեմի Պատգամաւորական ժողովի, Թեմական եւ Գործակալական խորհուրդների, համայն մեր ժողովրդի անունից եւ անձնապէս երախտագիտութիւն ենք յայտնում բարերար ամոլին եւ համայն գերդաստանին, հոգեւոր այս տունը մեր համայնքին ընծայաբերելու համար»,- ասաց Սրբազան Հայրը: Նա գնահատանքով անդրադարձաւ նաեւ եկեղեցու վերանորոգութեան, որը ամռան ընթացքում հովանաւորել եւ ամբողջացնել էր տւել բարերար Մեջլումեան ամոլը:
Սուրբ Պատարագի աւարտին տեղի ունեցաւ հանդիսաւոր հոգեհանգիստ, եկեղեցու բարերարների ծնողաց՝ Լեւոն եւ Վարդանոյշ Մեջլումեանների, հոգելոյս Տ. Նշան եպս. Թոփուզեանի, ինչպէս նաեւ ուրմիահայութեան եւ շրջակայքի գիւղերում ծառայած եւ ի տէր հանգչած հայ եկեղեցու բոլոր սպասաւորների հոգւոց ի հանգիստ:
Ս. Պատարագից անմիջապէս յետոյ, ներկայ բոլոր հաւատացեալները եկեղեցու «Արամ Մանուկեան» սրահում հիւրասիրեցին կէսօրւայ ճաշով, յատկապէս իրենց շնորհակալութիւնը յայտնելով հոգեւորականաց դասին, եկեղեցու «Նարեկացի» երգչախմբին եւ օրւայ սուրբ պատարագին իրենց օժանդակութիւնը բերած դպիրներին: Ժողովրդի անունից յատուկ արծաթեայ յուշանւէր յանձնւեց Սրբազան Հօրը, շնորհաւորելով նրա գրած Գ հատորը Ատրպատականի հայոց թեմի յուշարձանների պատմութեանը: Այս առիթով, յատուկ խօսքով հանդէս եկաւ Պատգամաւորական ժողովի Բ ատենադպրուհի Սարինէ Մեջլումեանը, վեր առնելով թեմի առաջնորդի նւիրեալ ծառայութիւնը, եւ թեմի պատմութեան արձանացումը յառաջիկայ դարերի համար:
Ճաշկերոյթի աւարտին, առաջնորդ Սրբազան Հայրը իր հայրական խօսքը ուղղեց նեկայ հաւատացեալներին, բարձր գնահատելով Ուրմիայի եւ շրջակայ գիւղերի բոլոր հոգաբարձական կազմերի, միութիւնների եւ կազմակերպութիւնների, Եկեղեցու Խնամակալ մարմինի, Գործակալական խորհրդի, ինչպէս նաեւ դպրոցի եւ մանկապարտէզի տնօրէնութիւնների եւ ՀՕՄ-ի վարչութեան բոլոր անդամներին: Համայնքի զօրութիւնը նա առնչեց մեր եկեղեցու եւ ազգի հանդէպ հաւատարմութեան գաղափարի հետ, որով գօտեպնդեց ներկաներին, հաւատարիմ մնալ ազգային մեծ հարստութեան՝ հայ եկեղեցու եւ հայ դպրոցին:
Այս առիթով, Սրբազան Հայրը գնահատեց եկեղեցու քարտուղար Ռաֆիկ Ալեքսանեանին, որը մնայուն ծառայութեան է նւիրւած համայնքի կեանքին: Այս առիթով, Սրբազան Հայրը նրան նւիրեց, իր հեղինակած «Ուղեւորութիւն Ատրպատականի հայոց թեմում» ի գրքի նորատիպ Գ հատորը:
Ուրմիահայութեան կեանքում, իրենց հոգեւոր տան՝ Ս. Ստեփանոս ծխական եկեղեցու տօնը իրօք փառաշուք հանդիսութեան վերածւեց, հոգեւորապէս զօրացնելով շրջանի մեր ժողովուրդը, համայնքային կեանքին նոր շունչ բերելով:
