ՄԱԿ-ում Իրանի մնայուն դեսպանը Snapback-ի կիրառման մասին. «Նման սադրիչ գործողութիւնը կարժանանայ Իրանի վճռական ու համաչափ պատասխանի»
«ԱԼԻՔ»- ՄԱԿ-ում Իրանի Իսլամական Հանրապետութեան մշտական ներկայացուցիչ Ամիր Սաիդ Իրաւաանին երեքշաբթի ԱԽ 2231 բանաձեւի եւ միջուկային համաձայնագրի կատարման վերաբերեալ Անվտանգութեան խորհրդի նիստում յայտարարել է, որ Snapback մեխանիզմի կիրառումը եւրոպական եռեակի կողմից Իրանի կողմից կարժանանայ համապատասխան կոշտ պատասխանի:
Իրաւանին յաւելել է, որ ժամանակն է մեկընդմիշտ պարզաբանել՝ այսպէս կոչւած Snapback (ձգանման մեխանիզմը) նրանց ձեռքի գործիքը չէ, որով կարող են սպառնալ Իրանին՝ չարաշահելով այդ առիթը: «Իրանը յստակ յայտարարել է, որ նման սադրիչ գործողութիւնը կարժանանայ վճռական ու համաչափ պատասխանի։ Այս դիրքորոշումը ժամանակին յստակօրէն նշւել էր 2019 թւականի մայիսի 8-ին եւրոպական եռեակի առաջնորդներին ուղղւած Իրանի նախագահի նամակում։ «Չեղեալ բանաձեւերի դրոյթները կրկին կիրառելու» այսպէս կոչւած Snapback մեխանիզմի ակտիւացումը մեծ ճգնաժամ է ստեղծելու, որը ձեռնտու չէ կողմերից ոչ մէկին»,- նշել է Իրաւանին:
Բարձրաստիճան դիւանագէտն ընդգծել է. «Չնայած եւրոպական եռեակի եւ ԱՄՆ-ի անհիմն մեղադրանքներին, յատկապէս, քաղաքական դրդապատճառներով պատժիչ բանաձեւի հետապնդմանը, Իրանը հաւատարիմ է մնալու Ատոմային էներգիայի միջազգային գործակալութեան հետ կատարելով իր պարտաւորութիւնները։
Դեսպանն իր ընթերցած յայտարարութեան մէջ նշել է. «Եւրոպական եռեակի ու ԱՄՆ-ի անիրատեսական պահանջները, քաղաքական կամքի բացակայութիւնը, նրանց ներքաղաքական նկատառումները եւ, յատկապէս, կապ չունեցող հարցերը բանակցութիւնների հետ կապելու փորձը, ի վերջոյ, համաձայնագրի վերակենդանացման ջանքերի ձախողման պատճառ դարձան»։
Իրաւանին նշելով, որ Իրանը կտրականօրէն մերժում է միջուկային համաձայնագրով Իրանի պարտաւորութիւնների փոխկապակցումը տարածաշրջանային կամ աշխարհաքաղաքական խնդիրների հետ, յաւելել է, որ Ուկրաինական հակամարտութիւնում իրանական զէնքի ենթադրեալ կիրառման կամ փոխանցման հետ կապւած պնդումները լիովին անհիմն են եւ շրջանառւել են քաղաքական դրդապատճառներով։ «Նման պատճառներ ունեն նաեւ, Իրանի հրթիռային ծրագրին ուղղւած մեղադրանքները, որոնք դուրս են թիւ 2231 բանաձեւի շրջանակներից, անտեղի են եւ չունեն որեւէ փաստական հիմք»,- նշել է դեսպանը։
Իրաւանին դիմելով ՄԱԿ-ի իր գործընկերներին նշել է. «Խորհրդի յարգարժան անդամներ, իմաստալից դիւանագիտութիւնը պահանջում է փոխադարձ յարգանք, փոխադարձութեան սկզբունք եւ տեւական հաւատարմութիւն միջազգային իրաւունքի դրոյթներին»։
«Եւրոպական եռեակը եւ Միացեալ Նահանգները պէտք է մի կողմ թողնեն իրենց սադրող մօտեցումները եւ քաղաքական կամք դրսեւորելով ի ցոյց դնեն դիւանագէտին համապատասխան կեցւածք»,- նշել է ՄԱԿ-ում Իրանի մնայուն դեսպանը եւ յաւելել, որ առաջ տանող ճանապարհն անցնում է պատասխանատւութեան եւ կառուցողական փոխգործակցութեան միջով, ոչ թէ սպառնալիքների, հարկադրանքի ու ճնշումների: «Անցեալի փորձը ցոյց է տւել, որ Իրանի դէմ սպառնալիքներն ու ճնշումներն անարդիւնաւէտ են եւ միայն կարող են վտանգել փոխադարձ վստահութիւնը բարդացնելով հետագայ ջանքերը»։
«Մենք խորապէս հաւատում ենք, որ միջուկային համապարփակ գործարքով համաձայնագիրը շարունակում է պահել իր արդիւնաւէտութիւնը եւ ամուր միջոց է Իրանի խաղաղ միջուկային ծրագրի շուրջ անհարկի ու յօրինւած ճգնաժամերը լուծելու համար: Իրանը պատրաստ է բովանդակալից համագործակցութեանը՝ պայմանով, որ միւս կողմերը իրատեսական քաղաքական կամք դրսեւորեն եւ հաւատարիմ մնան միջազգային իրաւունքի սկզբունքներին»,- եզրափակել է Իրաւանին։
