Իսլ. յեղափոխութեան առաջնորդ. «Արդարութիւնը հանրային հնարաւորութիւնների օգտագործման դասակարգային անջրպետի ժխտումն է»

«ԱԼԻՔ» – Իսլ. յեղափոխութեան առաջնորդ այաթ. Սէյէդ Ալի Խամենէին երէկ՝ երեկոյեան հանդիպել է մօտ 3000 ուսանողների եւ բարձարագոյն կրթական հաստատութիւնների քաղաքական, գիտական եւ մշակութային կազմակերպութիւնների ներկայացուցիչների հետ:

Աւելի քան 2.5 ժամ տեւած հանդիպման ժամանակ, Իսլամական յեղափոխութեան առաջնորդը երկրի եւ համակարգի հիմնական նպատակն անւանել է «աւելի լաւ վաղւայ օրը, քան այսօրը»: Նա ուսանողներին եւ ուսանողական կազմակերպութիւններին կոչ է արել նոր լուծումներ առաջարկել այս նպատակին հասնելու համար՝ շեշտելով. «Գիտնականներ կրթելը, գիտութիւն արտադրելը եւ այս երկու հիմնանպատակների հունաւորումը համալսարանների հիմնական խնդիրներն են»:

Ուսանողական միջավայրի բնոյթն անւանելով, որպէս ուրախ, աշխոյժ, յուզիչ եւ պահանջկոտ, եւ անդրադառնալով հանդիպամն ընթացքում ուսանողական կազմակերպութիւնների ներկայացուցիչների կողմից բարձրացւած հարցերին հետամուտ լինելու անհրաժեշտութեանը, այաթ. Խամենէին ասել է. «Իւրաքանչիւր առաջարկ պէտք է լինի իրատեսական եւ հասուն՝ միաժամանակ ունենալով վերլուծական եւ ինտելեկտուալ խորութիւն, եւ օգնի լուծել առկայ խնդիրները»:

Իսլամական յեղափոխութեան առաջնորդն ի պատասխան արդարութեան վերաբերեալ իր այսօրւայ եւ 1381 թւականի տեսակէտի տարբերութեան մասին ուսանողական կազմակերպութիւնների ներկայացուցիչներից մէկի ելոյթին, ընդգծել է. «Տարբերութիւնն այն է, որ արդարութեան հարցում իմ շեշտադրումն աւելացել է»:

«Արդարութիւնը, որը պէտք է ճիշտ ընկալւի, նշանակում է դասակարգային անջրպետի ժխտումը հանրային հնարաւորութիւնների օգտագործման հարցում, եւ հնարաւորութիւնների հաւասար հասանելիութեան ապահովում՝ հանրութեան համար: Քանի որ հնարաւորութիւնների հասանելիութեան հարցում առանձնայատուկ արտօնութիւններ ստեղծելն անարդարութիւն է եւ հակասում է արդարութեան սկզբունքին»,- ասել է այաթ. Խամենէին:

Իսլամական յեղափոխութեան առաջնորդը երկրի եւ համակարգի գլխաւոր նպատակն անւանելով «աւելի լաւ վաղւայ օրը, քան այսօրը» ընդգծել է. «Այս հիմնական նպատակն իրագործելու համար մենք պէտք է սահմանենք որոշակի իդէալներ»:

Այաթ. Խամենէին երկրի եւ համակարգի ներկայ վիճակի ճիշտ ընկալումը համարելով առաջին քայլը դէպի սահմանւած իդէալները եւ աւելի լաւ վաղւայ օրը շարժւելու համար, ասել է. «Ոմանք անտեղեակ են այն կարեւոր փաստի մասին, որ ներկայիս յեղափոխական համակարգը նախկին սեւ դարաշրջանի դէմ բարդ պայքարի արդիւնքն է: Իհարկէ յեղափոխութեան բազմաթիւ նպատակներ դեռ չեն իրականացւել, սակայն ուսանողական հանրութիւնը մշտապէս պէտք է ուշադրութիւն դարձնի «համակարգի յեղափոխական բնոյթի» եւ «անցեալի իրողութիւնների ըմբռնման» փաստի վրայ, այսօրւայ մասին ճիշտ դատողութիւններ անելու համար»:

Նշելով, որ երկրում առկայ խնդիրները եւ բացթողումները շատ աւելին են, քան հանդիպման ընթացքում ուսանողների կողմից բարձրացւած խնդիրները, Իսլ. յեղափոխութեան առաջնորդն ասել է. «Եթէ ուսանողական համայնքը մտածւած ու ծրագրաւորւած ձեւով երկրի ապագայի համար նպատակներ եւ արժեհամակարգ սահմանի եւ գծի դրանց իրագործման ճանապարհային քարտէզը, ապա 5 տարի յետոյ առկայ խնդիրները միանշանակ կը պակասեն»: